ٺٽو پوليس پاران سالياني رپورٽ پڌري، 3 هزار 47 جوابدار گرفتار ڪرڻ جي دعويٰ

89مقابلن دوران 74 ڏوهي گروهن جو خاتمو ڪيو، جن مان 1 جوابدار مارجي ويو، 27 زخمي حالت ۾ گرفتار ڪيا ويا: ايس ايس پي ٺٽو

ٺٽو(محمد شفيق ڀٽي) ٺٽو پوليس جي سال 2025 جي ڪارڪردگي رپورٽ, ايس ايس پي ٺٽو فاروق احمد بجاراڻي جي سربراهي هيٺ سال 2025 دوران ٺٽو پوليس جي ڪارڪردگي جون تفصيلون هن ريت آهن: سال 2025 دوران ضلعي ڀر ۾ داخل ٿيل 1924 مقدمن ۾ ٺٽو پوليس 3047 جوابدارن کي گرفتار ڪيو. ان دوران ايڪٽو ڪرمنلز خلاف ڪارروائين دوران 324 جوابدار گرفتار ڪيا ويا. 89 پوليس مقابلن دوران 74 ڏوهي گروهن جو خاتمو ڪيو ويو، جن مان 1 جوابدار مارجي ويو جڏهن ته 27 جوابدار زخمي حالت ۾ گرفتار ڪيا ويا. گرفتار جوابدارن خلاف آرمز ايڪٽ تحت 125 ڪيس داخل ڪري 125 جوابدارن کي گرفتار ڪيو ويو، جن وٽان غيرقانوني هٿيار طور 1 ڪلاشنڪوف، 2 رائفلون، 8 ريپيٽر، 114 پسٽل ۽ ريوالور ۽ 275 رائونڊس هٿ ڪيا ويا. جديد ٽيڪنالاجي جي مدد سان 3 بلائنڊ مرڊر ڪيس حل ڪري اصل جوابدارن کي گرفتار ڪيو ويو. ان کان علاوه ڊڪيتين جا 6 ڪيس ۽ رابري جا 46 ڪيس حل ڪري 77 جوابدار گرفتار ڪيا ويا. پوليس 269 روپوش ۽ اشتهاري جوابدار پڻ گرفتار ڪيا. گٽڪا، مين پوري ۽ ٻين گٽڪا مٽيريل بابت 565 ڪيس داخل ڪيا ويا، جن ۾ 895 جوابدار گرفتار ٿيا. گرفتار جوابدارن وٽان 67,182 ڪلو گٽڪا مٽيريل ۽ 186 گاڏيون هٿ ڪيون ويون. نارڪوٽڪس جي حوالي سان 421 ڪيس داخل ڪيا ويا، جن ۾ 665 جوابدار گرفتار ڪيا ويا. جوابدارن وٽان 117 ڪلو چرس، 9 ڪلو ڀنگ، 0.5 ڪلو آئس، 9,635 لٽر ديهي شراب ۽ وسڪي پنٽس هٿ ڪيا ويا. ان کان علاوه 5 چوري ٿيل فور ويل گاڏيون، 65 موٽر سائيڪلون ۽ 65 مويشي پڻ برآمد ڪيا ويا. جديد ٽيڪنالاجي جي مدد سان لکين رپين ماليت جا 170 چوري يا گم ٿيل موبائل فون ٽريس ڪري اصل مالڪن حوالي ڪيا ويا. ايس ايس پي آفيس ٺٽو ۾ قائم شڪاياتي سيل ۾ سال 2025 دوران وزيراعظم پورٽل، چيف منسٽر سنڌ، آءِ جي پي سنڌ، عدالتن ۽ سڌي ريت وصول ٿيل 2165 درخواستن مان 110 ڪيس داخل ڪرايا ويا، جڏهن ته سمورين 2165 درخواستگذارن جا مسئلا حل ڪيا ويا. ايس ايس پي آفيس ٺٽو ۾ قائم وومين پروٽيڪشن سيل ۾ متاثر عورتن ۽ ٻارن جي گهريلو جهيڙن، سائبر ڪرائم، بليڪ ميلنگ، هراسانگي، ريپ ۽ ٻين نوعيتن بابت 427 درخواستون وصول ٿيون، جن مان ڪيترن ئي معاملن جا مسئلا فوري طور حل ڪيا ويا.