ڍورو نارو واسين جو پلاٽ تي مبينا قبضي جي ڪوشش خلاف احتجاج

ڀائٽي آسن ڀيل منهنجي پلاٽ تي قبضي جي ڪوشش ڪري رهيو آهي: محرم ڀيل

عمرڪوٽ ( ڊ ، ر ) عمرڪوٽ جي علائقي ڍورونارو جي ڳوٺ کڻهار جي رهواسي محرم پٽ منجي ڀيل پريس ڪلب عمرڪوٽ ۾ پريس ڪانفرنس ڪندي الزام هنيو آهي ته سندس ڀائيٽو آسن ڀيل سندس ذاتي پلاٽ تي ناجائز قبضي جي ڪوشش ڪئي ۽ کيس موتمار ڌمڪيون ڏنيون، متاثر شخص دانهيندي چيو ته لڳاتار ڌمڪين سبب هو مجبور ٿي پنهنجي پلاٽ ٻي ڌر کي وڪڻي صرف ٻن ڪپڙن ۾ پنهنجي فيملي سميت ٻي هنڌ شفٽ ٿيو، پر الزام موجب آسن ڀيل اتي به پهچي ساڳئي پلاٽ تي قبضي جي ڪوشش ڪئي، هن چيو ته جوابدار پنهنجي دوستن سان گڏجي کيس ۽ سندس گهر واري کي تشدد جو نشانو بڻايو، جنهن سبب هو ۽ سندس خاندان خوف ۽ عدم تحفظ جو شڪار آهن، محرم ڀيل آءِ جي سنڌ، ڊي آءِ جي ميرپورخاص، ايس ايس پي عمرڪوٽ، سيشن جج عمرڪوٽ، سنڌ هاءِ ڪورٽ ۽ سپريم ڪورٽ آف پاڪستان کان اپيل ڪئي ته معاملي جو نوٽيس وٺي مٿس ٿيندڙ مبينا زيادتين جو ازالو ڪيو وڃي ۽ الزام هيٺ آيل شخص خلاف قانون موجب ڪاروائي ڪئي وڃي، متاثر شخص جو چوڻ هو ته جيڪڏهن کيس ۽ سندس خاندان کي تحفظ نه ڏنو ويو ته ڪو به وڏو نقصان ٿي سگهي ٿو، جنهن جي ذميواري لاڳاپيل ادارن تي عائد ٿيندي، هن مطالبو ڪيو ته غيرجانبدار جاچ ڪرائي وڃي ۽ قانون جي بالادستي کي يقيني بڻايو وڃي، ان موقعي تي لڇمڻ ڀيل، سوڍو، ھرلال، بالم ڀيل ۽ ٻيا موجود ھئا.