ڏوڪري ۾ شاگرد تي خيرپور ميرس پوليس جي تشدد خلاف احتجاج

پوليس بيگناهه کنڀي هٿ ڪڙيون هڻي تشدد جو نشانو بڻايو: صفيع الله جوڻيجو

ڏوڪري(اطهر ميمڻ)ڏوڪري ۾ جوڻيجا برادري ۽ شهرين طرفان خيرپور ميرس پوليس جي زيادتين ۽ شاگرد صفيع ﷲ جوڻيجو مٿان پوليس تشدد خلاف احتجاج ڪندي ذميوار اهلڪارن خلاف ڪارروائي ڪرڻ جو مطالبو ڪيو آهي. ڏوڪري پريس ڪلب اڳيان زرعي يونيورسٽي ٽنڊوڄام جي شاگرد صفيع ﷲ جوڻيجو، ايڊووڪيٽ سلمان ڀٽو، ايڊووڪيٽ اختيار خاتون برادري جي ٻين نوجوانن ۽ دوستن سان گڏ خيرپور ميرس پوليس خلاف مٿس ٿيندڙ مبينا تشدد، غيرقانوني حراست ۽ مبينا رشوت خلاف احتجاج ڪيو. ان موقعي تي صفيع ﷲ جوڻيجو صحافين کي ٻڌايو ته راڻي پور شادي تقريب تان واپسي تي اڳڙا پوليس کيس روڪي بائيڪ جا ڪاغذ پڇيا. موٽر سائيڪل اپلائيڊ فار رجسٽريشن ھئڻ ڪري کيس ٿاڻي تي ويھاري بيل ڪڙيون ۽ ڏنڊا ٻيڙيون هڻي تشدد ڪيو، جنھن بعد علائقي جي چڱي مڙس جي مداخلت ۽ مبينا رشوت بعد کيس آزاد ڪيو ويو. ھنن ڊي آءِ جي سکر، ايس ايس پي خيرپور ۽ ٻين کان مطالبو ڪيو تہ واقعي جي اڻ ڌري جاچ ڪرائي، ذميوار ايس ايڇ او امداد شيخ ۽ ٻين اهلڪارن خلاف ڪارروائي ڪري متاثر شاگرد کي انصاف فراھم ڪيو وڃي.