ملير: نجي اسپتال ۾ ڄاول ٻارڙو مبينا وڪرو ڪرڻ واري واقعي بعد اسپتال سيل

ملير (رپورٽ: عبدالرشيد مورجھريو) ميمڻ ڳوٺ جي نجي اسپتال ۾ غربت سبب آپريشن جا پئسا نه ڏيڻ تي ماءُ ماهِين جوکيو جو تازو ڄاول ٻار وڪرو ڪرڻ واري افسوسناڪ واقعي جو نئون رخ سامهون اچي ويو آهي۔ پوليس اسپتال کي سيل ڪري ڇڏيو آهي، جڏهن ته ڪيس ۾ نامزد ڊاڪٽراڻِي زهرا ميمڻ ۽ ٻين جوابدارن جي گرفتاري اڃا تائين عمل ۾ نه اچي سگهي آهي واقعي جي جاچ ڪندڙ پوليس موجب ٻار جي پيءُ سارنگ جوکيو جي فرياد تي ميمن ڳوٺ ٿاڻي تي ڪيس داخل ڪيو ويو جنهن ۾ اسپتال جي ڊاڪٽراڻِي، عملي ۽ ٻين ملوث ماڻهن کي نامزد ڪيو ويو آهي۔ پوليس چوي ٿي ته چار ماڻهن جا بيان قلمبند ڪيا ويا آهن، جڏهن ته مکيه جوابدار ڊاڪٽراڻِي زهرا ميمڻ روپوش آهي ۽ سندس گرفتاري لاءِ ڇاپا هنيا پيا وڃن پوليس موجب جاچ دوران معلوم ٿيو ته اسپتال انتظاميا آپريشن جا خرچ ادا نه ٿيڻ تي ڄاول ٻار کي غير قانوني طور تي وڪرو ڪيو، جيڪو بعد ۾ لاهور مان بازياب ڪرايو ويو۔ جاچ ڪندڙ ٽيم جو چوڻ آهي ته ٻار جي وڪري جي سموري ڪڙي، ان ۾ شامل ماڻهن ۽ خريد ڪندڙ ڌر جي باري ۾ تفصيل سان تحقيق ڪئي پئي وڃي۔واقعي بابت پوليس جو چوڻ آهي ته اسپتال کي مڪمل طور سيل ڪيو ويو آهي ۽ سمورا طبي رڪارڊ به ضبط ڪيا ويا آهن، جيئن جاچ دوران ثبوت محفظ رهن ياد رهي ته 5 آڪٽوبر تي ڄامشورو سان تعلق رکندڙ ماهين جوکيو جو ميمن ڳوٺ جي نجي اسپتال ۾ آپريشن ذريعي ٻار پيدا ٿيو هو، جيڪو مبينا طور اسپتال مان وڪرو ڪيو ويو۔ ڪجهه ڏينهن بعد پوليس ڪارروائي ڪندي ٻار کي لاهور مان بازياب ڪرايو هو علائقي جي سماجي تنظيمن ۽ شهرين حڪومت کان مطالبو ڪيو آهي ته اسپتال جي غير قانوني ڪارروائين ۾ ملوث ڊاڪٽرن ۽ عملي خلاف سخت قدم کنيا وڃن ۽ متاثر خاندان کي انصاف فراهم ڪيو وڃي۔