ڏوڪري ۾ جسقم جي سڏ تي سارين جي اگهه ۾ گهٽتائي خلاف 3 ڪلوميٽر پيادل مارچ ۽ احتجاج

جسقم، پ پ ش ڀ، نوجوان سماجي اتحاد، ايس يو پي، پي ٽي آءِ ۽ ٻين تنظيمن جي اڳواڻن ڳجهڙ کان ڏوڪري تائين پيادل مارچ ڪيو

ڏوڪري(اطهر ميمڻ) ڏوڪري ۾ سارين جا اگھ گهٽ هجڻ خلاف جسقم تعلقي ڏوڪري جي سڏ تي ڳوٺ ڳجهڙ کان ڏوڪري تائين ٽي ڪلو ميٽر پيادل مارچ ڪيو ويو. جسقم تعلقي ڏوڪري جي سڏ تي پ پ ش ڀ، نوجوان سماجي اتحاد ڏوڪري، ايس يو پي، سنڌ سڀا، تحريڪ انصاف، ايم ڪيو ايم پاڪستان ۽ مختلف تنظيمن جي اڳواڻن اڳواڻ رڪ سنڌي، امتياز کوهارو، ارشاد ٻگهيو، عمير جوڻيجو، طارق منگي، تنوير ڪولاچي، صابر جروار، ياسين ميراڻي، ساجد جتوئي ۽ ٻين جي اڳواڻي ۾ ڳوٺ ڳجهڙ کان ڏوڪري پريس ڪلب تائين ٽي ڪلو ميٽر پيادل مارچ ڪيو. اڳواڻن جو چوڻ هو ته واپارين هڪ هٽي قائم ڪري سارين جا اگھ گهٽ مقرر ڪري ڇڏيا آهن. هنن چيو ته سنڌ حڪومت سارين جا اگھ گهٽ مقرر ڪري آبادگارن جو معاشي قتل عام ڪري رهي آهن هنن چيو ته زرعي دوائون ۽ زرعي ڀاڻ جا اگھ چوٽ چڙهيل آهن. هنن چيو ته سارين جا اگھ گهٽ هجڻ آبادگار جو زمين تي ڪيل خرچ به نه ٿو نڪري. هنن مطالبو ڪندي چيو ته بنا دير سارين جا اگھ وڌايا وڃن ٻئي صورت وڌيڪ احتجاج ڪيو ويندو.