ملير: گلشن حديد ۽ اسٽيل ٽائون ۾ پاڻي جي بندش خلاف علامتي بک هڙتال

حديدين سٽيزن ايڪشن ڪميٽي طرفان علامتي بک هڙتالي ڪيمپ قائم ڪئي وئي

ملير (رپورٽ: عبدالرشيد مورجھريو) گلشن حديد ۽ اسٽيل ٽائون جا رهواسي ڊگهي عرصي کان پاڻي جي شديد کوٽ جو شڪار آهن۔ هن سنگين مسئلي خلاف مختلف نقطئه نظر رکندڙ ماڻهن جي نمائنده تنظيم حديدين سٽيزن ايڪشن ڪميٽي پاران علامتي بک هڙتالي ڪيمپ سنڌو چوڪ وٽ شروع ڪئي وئي آهي ان سلسلي م منتظمين جو چوڻ آهي ته هي احتجاج پاڻي جي بندش، ٽينڪر مافيا جي اجاراداري خلاف جدوجهد ۽ ناقص بورنگ سسٽم کان نجات حاصل ڪرڻ لاءِ ڪيو پيو وڃي۔ شهريّن کي اپيل ڪئي وئي آهي ته هو پاڻي جي خالي ٿانون سان گڏ ڪيمپ ۾ شرڪت ڪن ته جيئن انتظاميا تائين پنهنجو احتجاج پرامن پر اثرائتي نموني پهچائي سگهجي۔منتظمين جو چوڻ آهي ته گلشن حديد ۽ اسٽيل ٽائون جا رھواسي ڊگهي عرصي کان واٽر سپلائي جي بندش کي منهن ڏئي رهيا آهن، جنهن سبب ماڻهو مسجدن مان پاڻي ڀرڻ ۽ ٽٽل لائينن مان پاڻي گڏ ڪرڻ تي مجبور ٿي ويا آهن۔حديدين سٽيزن ايڪشن ڪميٽي جي اڳواڻن چيو ته هي جدوجهد ڪنهن هڪ طبقي جي نه پر سڄي علائقي جي گڏيل مسئلي جي آواز آهي۔ ڪيمپ جي پهرين ڏينهن وڪيلن، علمن، واپارين، دوڪاندارن، سماجي ڪارڪنن ۽ عام شهرين وڏي تعداد ۾ شرڪت ڪئي ۽ پنهنجي حقن جي لاءِ نعره بازي ڪئي۔رهنمائن چيو ته هاڻي وقت اچي ويو آهي جو ماڻهو پنهنجا مسئلا لڪائڻ بدران گڏجي جدوجهد ڪن ته جيئن علائقي کي ٽينڪر مافيا ۽ ناقص پاڻي نظام کان نجات ملي سگهي۔احتجاجي ڪيمپ جي منتظمين وڌيڪ ٻڌايو ته هي احتجاج سوشل ميڊيا ۽ اليڪٽرانڪ ميڊيا ذريعي به اجاگر ڪيو ويندو، جيئن حڪام تائين عوامي مسئلن جي شدت پهچي سگهي۔ علائقي جي ماڻهن پڻ هن احتجاجي قدم جي پوري حمايت جو اعلان ڪيو ۽ چيو ته جيڪڏهن فوري طور تي قدم نه کنيا ته احتجاج جو دائرو وڌايو ويندو۔