ملير: ابراهيم حيدري جي سماجي اڳواڻ جميل خاصخيلي جو ڀاءُ هفتي کان گم

علي اڪبر خاصخيلي 22 آڪٽوبر جي صبح گهران ڪم سانگي نڪرڻ بعد واپس نه وريو: وارث

ڳولا باوجود نوجوان جو پتو ناهي پئجي سگهيو، کيس ڳولڻ ۾ مدد ڪئي وڃي: مطالبو ملير (رپورٽ: عبدالرشيد مورجھريو) ابراهيم حيدري جي نالي واري سماجي اڳواڻ جميل خاصخيلي جو ڀاءُ علي اڪبر خاصخيلي ولد محمد سليم گذريل هڪ هفتي کان پُراسرار نموني لاپتا آهي گهر وارن موجب علي اڪبر 22 آڪٽوبر جي صبح معمول موجب ڪم تي وڃڻ لاءِ گهران نڪتو هو پر شام تائين واپس نه آيو سندس ڪنهن سان به ڪو رابطو نه ٿي سگهيو اهين گم ٿيل نوجوان جو تعلق گورچ پاڙي ابراهيم حيدري سان آهي گهر ڀاتين جو چوڻ آهي ته علي اڪبر روزانو صبح سوير ڪم تي ويندو هو ۽ وقت تي واپس ايندو هو، پر انهيءَ ڏينهن کان پوءِ سندس ڪو پتو ناهي پيو۔ وارثن موجب هن کي ڳولڻ لاءِ مائٽن، دوستن ۽ پاڙيسرين سان رابطو ڪيو ويو، پر ڪابه معلومات نه ملي گهر وارن خدشو ظاهر ڪيو آهي ته علي اڪبر سان ڪو ناخوشگوار واقعو پيش آيو هوندو۔ پوليس کي اطلاع ڏني وئي آهي ۽ مختلف ٿاڻن ۾ ڳولا جاري آهي سماجي اڳواڻ جميل خاصخيلي عوام، مقامي انتظاميا ۽ قانون لاڳو ڪندڙ ادارن کي اپيل ڪئي آهي ته علي اڪبر خاصخيلي جي ڳولا ۾ مدد ڪئي وڃي۔ هن چيو ته جيڪڏهن ڪنهن ماڻهو علي اڪبر کي ڪٿي ڏٺو آهي يا سندس بابت ڪا ڄاڻ رکي ٿو، ته مهرباني ڪري فوري طور اطلاع ڏئي علائقي واسين پڻ مطالبو ڪيو آهي ته انتظاميا لاپتا نوجوان جي جلد بازيابي لاءِ قدم کڻي، جيئن سندس خاندان جي پريشاني ختم ٿي سگهي۔