ملير ۾ هٿياربندن جو فارم هائوس تي حملو، عملو يرغمال، 65 کان 70 ٻڪريون ڦر

رات لڳ ڀڳ 11 وڳي 8کان 10هٿياربند جوابدار هڪ مزدا گاڏي ۾ اچي فارم تي ڪاهه ڪئي؛ ذريعا

ملير (رپورٽ: عبدالرشيد مورجھريو) ڪراچي جي علائقي ايم ڊي اي سوسائٽي لنڪ روڊ وٽ قائم هڪ فارم هائوس ۾ گذريل رات ڏيٽي جي سنگين واردات پيش آئي، جتي نامعلوم هٿياربندن عملو يرغمال بڻائي 65 کان 70 بڪريون ڦر ڪري فرار ٿي ويا۔ واقعو رات لڳ ڀڳ 11 وڳي پيش آيو ذريعن موجب اٺ کان ڏهه هٿياربند جوابدار هڪ مزدا گاڏي ۾ اچي فارم تي پهتا، جتي هنن موجود ملازمن کي رسن ٻڌي ڇڏيو ۽ بڪريون گاڏي ۾ ڀري موقع تان فرار ٿي ويا۔ ذريعن مطابق جوابدارن واردات دوران سي سي ٽي وي ڪيمرا ۽ ڊي وي آر سسٽم ٽوڙي ڇڏيا ته جيئن انهن جي سڃاڻپ نه ٿي سگهي واقعي جي اطلاع اسٽيل ٽائون پوليس اسٽيشن کي ڏني وئي، جنهن بعد پوليس ٽيم واقعي واري هنڌ پهچي جاچ شروع ڪئي ۽ شاهدي مواد گڏ ڪيو فارم جي مالڪ شيخ علي ميڊيا سان ڳالهائيندي چيو ته اها واردات منصوبا بندي تحت ڪئي وئي آهي۔ هن پوليس ۽ ٻين قانون لاڳو ڪندڙ ادارن کان فوري ڪارروائي ۽ جوابدارن جي گرفتاري جو مطالبو ڪيو۔