ٺٽو: فاطميد فائونڊيشن بلڊ بينڪ ۽ ٺٽو پوليس جي سهڪار طبي ڪيمپ قائم

پوليس هيڊڪوارٽر ٺٽو مڪلي ۾ ٿيليسيميا ۾ مبتلا مريض ٻارن لاءِ رت گڏ ڪرڻ واري ڪيمپ قائم

ٺٽو (شفيق ڀٽي)فاطميد فائونڊيشن بلڊ بينڪ ۽ ٺٽو پوليس جي سهڪار سان پوليس اسپتال، پوليس هيڊڪوارٽر ٺٽو مڪلي ۾ ٿيليسيميا ۾ مبتلا مريض ٻارن لاءِ رت گڏ ڪرڻ واري ڪيمپ جو اهتمام ڪيو پيو وڃي، جيڪا اڄ 2 ڊسمبر 2025ع تي صبح 10 وڳي کان شام 5 وڳي تائين جاري رهندي۔ضلعي پوليس پاران جاري ڪيل پريس نوٽ ۾ عوام کي اپيل ڪئي وئي آهي ته ٿيليسيميا جي مريض معصوم ٻارن جون زندگيون بچائڻ لاءِ وڌ کان وڌ تعداد ۾ ڪيمپ تي اچي رت جو عطيو ڏين۔ پوليس ترجمان موجب رت ڏيڻ نه رڳو صدقو جاريه آهي پر انساني جان بچائڻ جو بهترين ذريعو پڻ آهي۔ياد رهي ته فاطميد فائونڊيشن ملڪ جو سڀ کان معتبر بلڊ سروس ادارو آھي ، ھي ادارو پاڪستان جو هڪ غير منافع بخش ۽ معتبر ادارو آهي، جيڪو سالن کان ٿليسيميا، هيموفيليا ۽ رت جي ٻين بيمارين ۾ مبتلا مريضن کي مفت رت، اسڪرينگ، دوائون ۽ ميڊيڪل سهولتون فراهم ڪري رهيو آهي۔ ادارو روز جي بنياد تي هزارين ضرورت مند مريضن کي محفوظ رت مهيا ڪرڻ لاءِ سڄي ملڪ ۾ بلڊ ڊونيشن ڪيمپون لڳائيندو رهندو آهي۔انتظاميه موجب ٿليسيميا جا گهڻا مريض ننڍا ٻار هوندا آهن، جن کي هر مهيني باقاعدي رت چاڙهائڻو پوندو آهي، جنهن سبب اهڙيون ڪيمپون انهن ٻارن لاءِ زندگيءَ جو اهم سهارو آهن۔پريس نوٽ ۾ وڌيڪ چيو ويو آهي ته جنھن ھڪ انسان جي جان بچائي ، ڄڻ ته ان سموري انسانيت جي جان بچائي، تنهن ڪري شهرين کي اپيل آهي ته هن نيڪ عمل ۾ ڀرپور حصو وٺن.