ملير: پورٽ قاسم جي لڳ گودام ۾ اوچتو باهه ڀڙڪي پئي، ريسڪيو عملي پاران آپريشن

ملير (رپورٽ: عبدالرشيد مورجھريو) پورٽ قاسم جي لڳ هڪ وڏي گودام ۾ اوچتو باهه ڀڙڪي پئي اطلاع تي فائربريگيڊ جي ڪيترين ئي گاڏين فوري طور واقعي واري هنڌ پهچي ويون ۽ باهه تي ضابطو آڻڻ لاءِ ريسڪيو آپريشن شروع ڪري ڇڏيو۔ ريسڪيو ذريعن موجب باهه جي شدت گهڻي آهي، پر فائرفائٽر مڪمل ڪوشش ڪري رهيا آهن ته شعلن کي گودام جي ٻين حصن تائين پکڙجڻ کان روڪيو وڃي۔انتظاميه تصديق ڪئي آهي ته گودام اندر موجود سڀئي ماڻهو وقت سر ٻاهر ڪڍي ورتا ويا آهن ۽ ڪو به جاني نقصان رپورٽ نه ٿيو آهي۔ ڄاڻ موجب گودام ۾ بنيادي طور چانورن جو وڏو ذخيرو موجود هوشروعاتي تحقيقات ۾ انڪشاف ٿيو آهي ته گودام جي ڇت تي ويلڊنگ جو ڪم جاري هو، جنهن دوران ويلڊنگ مان نڪتل چنگاري هيٺ رکيل سامان تي ڪري پئي ۽ باهه ڀڙڪ اٿي۔ ڪجهه ئي لمحن ۾ باهه شدت اختيار ڪري وڏي حصي کي پنهنجي لپيٽ ۾ وٺي ڇڏيو فائربريگيڊ عملدارن جو چوڻ آهي ته باهه تي جلدي ضابطو آڻڻ لاءِ اضافي پاڻي واريون باؤزر گاڏيون به طلب ڪيون ويون آهن ۽ ريسڪيو ٽيمون پڻ مدد ۾ سرگرم آهن۔ گودام ۾ رکيل چانورن جي ذخيري کي بچائڻ جي هر ممڪن ڪوشش ڪئي پئي وڃي، پر باهه سبب ڳري مالي نقصان جو خدشو ظاهر ڪيو پيو وڃي۔