ملير ڪينٽ ٿاڻي جي حد ۾ ڪار تي فائرنگ، هڪ ڄڻو مارجي ويو، عورت زخمي

فائرنگ ۾ ريئل اسٽيٽ جو ڪم ڪندڙ علي اصغر بجاراڻي مارجي ويو، ساڻس گڏ ويٺل عورت زخمي ٿي پئي

ملير (رپورٽ: عبدالرشيد مورجھريو) ملير ڪينٽ ٿاڻي جي حدن ڀٽائي آباد ۾ ڪار تي اوچتي فائرنگ جي واقعي ۾ هڪ شخص مارجي ويو جڏهن⁠تہ هڪ عورت زخمي ٿي پئي۔ اهو افسوسناڪ واقعو شام جي وقت تڏهن پيش آيو جڏهن ڪار جمالي روڊ تان گذري رهي هئي ته موٽرسائيڪل سوار نامعلوم حملہ آور اوچتو ويجهو اچي اندھاڌند فائرنگ ڪري فرار ٿي ويا پوليس موجب فائرنگ ۾ ڪار جو ڊرائيور شديد زخمي ٿيو، جيڪو ٿوري دير بعد دم ڏئي ويو، جڏهن⁠ تہ ساڻس گڏ ويٺل عورت کي زخمي حالت ۾ اسپتال منتقل ڪيو ويو، جتي هن کي طبي امداد فراهم ڪئي پئي وڃي۔ شاهدن جو چوڻ آهي ته ڪار معمول موجب روڊ ڏانهن روان هئي ته اوچتو ٻن موٽرسائيڪل سوارن ويجهو اچي سڌي فائرنگ شروع ڪري ڏني ۽ واقعي کان پوءِ بنا رنڊڪ جي فرار ٿي ويا۔ واردات انتهائي پلاننگ سان ڪئي وئي لڳي ٿي۔واقعو پيش اچڻ بعد پوليس جي وڏي نفري هنڌ تي پهتي ۽ علائقي جو محاصرو ڪري شواهد گڏ ڪرڻ شروع ڪيا۔ واقعي واري هنڌ تان گولين جا خول به هٿ لڳا آهن، جيڪي فرانزڪ ليبارٽري موڪليا ويا آهن۔پوليس جي ابتدائي جاچ موجب واقعي جا امڪاني سبب ذاتي دشمني يا ٽارگيٽيڊ حملي جا ٿي سگهن ٿا، پر هر رخ کان جاچ جاري آهي۔ پوليس ڀرپاسي لڳل سي سي ٽي وي ڪيمرائن جون فوٽيجز به حاصل ڪري ورتيون آهن، ته جيئن حمله آورن جي سڃاڻپ ٿي سگهي مارجي ويل شخص جي سڃاڻپ علي اصغر بجاراني طور ٿي آهي۔ ابتدائي ڄاڻ موجب مقتول جو ڀاءُ به ماضي ۾ هڪ حملي ۾ مارجي چڪو آهي۔ وڌيڪ اها معلومات به سامهون آئي آهي ته مقتول ريئل اسٽيٽ جي ڪاروبار سان لاڳاپيل هو، پر پوليس ان سلسلي ۾ وڌيڪ جاچ ڪري رهي آهي۔