ڏوڪري ۾ حددخلين جو آزار جاري، روڊ رستا سوڙها ٿي ويا، اچ وڃ ۾ شهرين کي تڪليفون

انتظاميه حددخلين خلاف ڪارروائي بدران ننڊ سُتل آهي: شهري

ڏوڪري(اطهر ميمڻ) ڏوڪري ۾ حددخليون وڌي ويون،جنهن سبب شهر مڙني روڊ رستن تي هر وقت ٽرئفڪ جام رھڻ، انتظاميا ڪو به تحرڪ نه ورتو.عوام سخت پريشانين کي منهن ڏين لڳو. تفصيل موجب ڏوڪري ۾ حددخلين سبب شهر جا اهم روڊ ۽ رستا سوڙها ٿي ويا آهن، جڏهن تہ ٽريفڪ جام معمول بڻجي ويو آهي. شهر جي مرڪزي علائقن، جهڙوڪ مين بازار، اسٽيشن روڊ ۽ بس اسٽينڊ چوڪ تي غيرقانوني ريڙيون، چنگچي ڊرائيور ۽ واپارين دوڪانن جا دڪا وڌائڻ سبب شهر جو حُسن متاثر ٿي ويو آهي ۽ شهري مشڪلاتن کي منهن ڏيڻ لڳا آهن،رش سبب شهرين کي اچ وڃ ۾ پڻ مشڪلاتون پيش اچي رهيون آهن. هوڏانهن شهر اندر سرڪاري زمينن ۽ عمارتن تي به بااثر ڌرين جا قبضا ٻڌايا پيا وڃن. ذريعن موجب ڪيترن ئي هنڌن تي پراڻن سرڪاري پلاٽن ۽ رستن تي غيرقانوني تعمير ٿيندڙ دڪان ۽ عمارتون ٺھڻ سبب شهري پريشان آهن جڏهن تہ بلدياتي انتظاميا بي وس نظر اچي رهي آهي، ٽائون انتظاميا طرفان ملازمن کي رش گھٽائڻ لاءِ مقرر ڪيو ويو آهي.انهي موقعي تي شهرين جو چوڻ آهي ته انتظاميا ڪاغذي ڪارروائين تائين محدود ٿي وئي آهي ۽ عملي طور تي ڪو به اثرائتو قدم نه کنيو ويو آهي. ڏوڪري جو هر روڊ هاڻي قبضن جي ور چڙهيل آهي، حد دخلين سبب خوبصورت شهر جو نقشو بگڙي ويو آهي،ھنن سماجي حلقن ۽ شهري تنظيمن لاڳاپيل اختيارين کان مطالبو ڪيو آهي ته فوري طور تي جامع آپريشن ڪري حددخليون ھٽائڻ جو مطالبو ڪيو آهي ۽هر وقت روڊن تي بيٺل غيرقانوني ريڙها، ڇپرا ۽ وڌايل دڪا هٽايا وڃن ۽ سرڪاري ملڪيتون تان قبضا ختم ڪرائي شهر کي پنهنجو اصل روپ واپس ڏنو وڃي.