ٺٽو پوليس پاران ڏوهاري کي گرفتار ڪرڻ جي دعويٰ

ٺٽو (شفيق ڀٽي)ٺٽي ضلعي ۾ ستيون روڊ بھراڻي پل وٽ پوليس ۽ ڏوهارين وچ ۾ فائرنگ جو مقابلو ٿيو، جنهن دوران هڪ ملزم زخمي حالت ۾ گرفتار ڪيو ويو. پوليس موجب گرفتار ٿيل ملزم غلام سرور ولد جمن بلوچ، ڳوٺ رسول بخش بروهي مڪلي جو رهواسي آهي. ابتدائي تفتیش ۾ ظاهر ٿيو آهي ته غلام سرور ٿاڻو ٺٽو ۽ مڪلي جي مختلف علائقن ۾ رهزني ۽ موٽرسائيڪل ڦرڻ جي ڪيترين ئي وارداتن ۾ ملوث رهيو آهي. پوليس دعويٰ ڪئي آهي ته گرفتار ملزم جي قبضي مان ڏوهاري ڪارروائين ۾ استعمال ٿيل پسٽل به هٿ ڪيو ويو آهي. پوليس ترجمان جو چوڻ آهي ته گرفتار زخمي ملزم جو مڪمل ڪرمنل رڪارڊ چيڪ ڪيو پيو وڃي، جڏهن⁠ تہ سندس ٻه ساٿي نفيس الرحمان ولد محمد حسين خشڪ ۽ نزاڪت ولد امام بخش خشڪ مقابلي دوران فرار ٿي ويا، جن جي گرفتاري لاءِ ڇاپا هنيا پيا وڃن. پوليس موجب زخمي ملزم کي علاج لاءِ اسپتال منتقل ڪيو ويو آهي، جڏهن⁠ تہ سندس ٻين ساٿين جي گرفتاري تائين ڪارروائي جاري رهندي.