هيوي ٽريفڪ تي پابنديءَ وارو حڪم نظرانداز، سنڌ هاءِ ڪورٽ ۾ توهين عدالت جي درخواست داخل

بئريسٽر فيض محمد، بئريسٽر حمزه، ايڊووڪيٽ محمد عمار نوناري ۽ ايڊووڪيٽ جهانگير شمس توهين عدالت جي درخواست داخل ڪرائي

ڪراچي (اسٽاف رپورٽر) مهراڻ نيشنل هاءِ وي تي هيوي ٽريفڪ تي پابندي واري عدالتي حڪم تي عملدرآمد نه ڪرڻ خلاف سنڌ هاءِ ڪورٽ ۾ توهين عدالت جي درخواست داخل ڪئي وئي آهي. توهين عدالت جي درخواست بئريسٽر فيض محمد، بئريسٽر حمزه، ايڊووڪيٽ محمد عمار نوناري ۽ ايڊووڪيٽ جهانگير شمس پاران داخل ڪئي وئي آهي. ياد رهي ته 2022 ۾ ايڊووڪيٽ جهانگير شمس مهراڻ هاءِ وي تي هيوي ٽريفڪ جي داخلا خلاف درخواست داخل ڪرائي هئي. معزز عدالت مهراڻ هاءِ وي تي هيوي ٽريفڪ تي پابندي جو حڪم ڏنو پر ان حڪم تي عمل نه ڪيو ويو. نتيجي ۾ بيشمار معصوم جانيون ضايع ٿي چڪيون آهن. عوامي احتجاج ۽ پرامن مطالبن جي باوجود، اختياريون ڪابه ڪارروائي ڪرڻ ۾ ناڪام رهيون آهن. گذريل ڏينهن، بئريسٽر فيض محمد، بئريسٽر علي حمزه، ايڊووڪيٽ محمد امر نوناري ۽ ايڊووڪيٽ جهانگير شمس سنڌ هاءِ ڪورٽ ڪراچيءَ ۾ توهين عدالت جي درخواست داخل ڪئي، جنهن ۾ اپيل ڪئي وئي ته مهراڻ هاءِ وي تي هيوي ٽريفڪ تي پابندي واري عدالتي حڪم جي ڀڃڪڙي ڪندڙ ذميوارن جو احتساب ڪيو وڃي.