ملير: درساڻو ڇنو گرين بيلٽ جا حامي ۽ مخالف هڪ ئي صف ۾ بيهي رهيا،ملير جو عوام حيران ۽ مايوس

معجزاتي تبديلي جي پويان ايوب پٺاڻ جو ڪردار آهي جنهن سڀني جا وظيفا مقرر ڪيا آهن: سماجي اڳواڻ راحيل بلوچ

ملير (رپورٽ: عبدالرشيد مورجھريو)درساڻو ڇنو لڳ ملير جي گرين بيلٽ مان ريتي بجري غيرقانوني چوري ڪرڻ بابت حيرت انگيز تبديلي سامهون آئي آهي، جتي هن چوري جا سخت مخالف ۽ حامي هاڻي هڪ ئي صف ۾ بيٺل ڏسڻ ۾ اچي رهيا آهن. جيڪي ڌريون ڪالهه تائين هڪ ٻئي خلاف نعرا هڻي رهيون هيون ۽ دشمن بڻيل هيون، اهي اڄ ساٿ ۽ دوستيءَ ۾ جڙيل نظر اچي رهيون آهن. ملير جي سماج سڌارڪ راحيل بلوچ انڪشاف ڪيو آهي ته هن “معجزاتي تبديلي” جي پويان ايوب پٺاڻ جو وڏو ڪردار آهي جنهن مبينا طور سڀني لاءِ وظيفا مقرر ڪري ڇڏيا آهن. ان کان پوءِ اڳوڻا تنقيد ڪندڙ به خاموش ٿي ويا آهن ۽ ڪنهن به قسم جو اعتراض ڪرڻ لاءِ تيار نظر نٿا اچن سوشل ميڊيا تي شهرين طرفان هن صورتحال تي سخت ردعمل ڏنو پيو وڃي. ڪيترن ئي ماڻهن لکيو آهي ته علائقي جي ماحولياتي ۽ سماجي مفادن کي نظرانداز ڪري ڪجهه ماڻهن پنهنجي مفادن جي تحفظ لاءِ دوستيون ۽ ٺاهه ڪيا آهن جتي ماڻهن منصوبي تي سوال اٿاريا آهن ۽ ڳوٺاڻن جي حقن جي ڳالهه ڪئي پئي وڃي.مقامي ماڻهن جو چوڻ آهي ته گرين بيلٽ جهڙا منصوبا صرف تڏهن فائدي مند ٿي سگهن ٿا، جڏهن اهي شفافيت، ماحولياتي بچاءَ ۽ عوامي مفادن جي بنيادن تي هلن، نه ته اهي صرف سياسي مفاهمتن ۽ ذاتي فائدي جو ذريعو بڻجي ويندا.