ڏوڪري ۾ آرا مشين يونين، ٽريڪٽر اونرز ۽ مزدورن طرفان پوليس خلاف احتجاج

غلام شبير سنديلو، فياض سومرو، لياقت علي، قربان ٻگھيو، ديدار ڪوري ۽ ٻين جي اڳواڻي ۾ احتجاج ڪيو ويو

ڏوڪري(اطهر ميمڻ) ڏوڪري ۾ آرا مشين يونين ۽ ٽريڪٽر اونرز ۽ مزدورن طرفان ڏوڪري پوليس جي زيادتين خلاف پريس ڪلب اڳيان احتجاجي مظاهرو ڪري ڌرڻو ھنيو. ان موقعي تي صحافين اڳيان دانهيندي آرا مشين يونين جي اڳواڻن ۽ مزدورن غلام شبير سنديلو، فياض سومرو، لياقت علي، قربان ٻگھيو، ديدار ڪوري، بيگ محمد ٻرڙو ۽ ٻين چيو ته ڏوڪري تعلقي ۾ ڪاٺ جي واپارين ۽ مزدورن سان پوليس جي زيادتين سبب 15 ڏينھن کان آرا مشينون ۽ ڪاروبار مڪمل طور تي بند پيل آھي، جنھن سبب سوين مزدور بيروزگار بڻيل آھن. ھنن چيو ته آرا مشين مالڪ توڙي بروڪر ڪنھن بہ ٻيلي جو وڻ نه وڍيندا آھيون، باقي ذاتي سروي نمبرن، گھرن ۽ زمينن ۾ ڪريل وڻ ڪٽيندا آھيون، جنھن بابت ٻيلي کاتي کي پڻ اطلاع ڏيندا آھيون، پر تنھن باوجود ڊي ايس پي ڏوڪري جو ذاتي گن مين ۽ ايئرپورٽ، سيھڙ، گاجيديرو، باڊھ، ويھڙ ۽ ٻين ٿاڻن جا ايس ايڇ اوز 10 ھزارن کان 50 ھزار رشوت گهري رھيا آھن. ايس ايڇ او ايئرپورٽ لياقت کجڙ ڏيڍ لک رپيا رشوت گھري رھيو آھي، نه ڏيڻ تي اسان جو ھڪ ٽريڪٽر چالان ڪرڻ سميت ڊرائيور شفقت ٻرڙو اڃان تائين گم ڪري ڇڏيو آھي. ھنن چيو ته پوليس کي رشوت ڏيڻ سبب ڪاٺ مھانگو وڪڻڻ بجاءِ آرا مشينون بند ڪري ڇڏيون آھن، جنھن ڪري واڍا، ڊکڻ، ڪاٺ جون پٽيون ٺاھيندڙ، گڏھ گاڏن، ٽريڪٽرن جا سوين مزدور بيروزگار بڻيل آھن، جڏھن ته در، دريون، گھرن جي ٻارڻ جو ڪاٺ ۽ قبر ۾ دفنائڻ لاءِ ڪاٺ جا ڦٽا نه ملڻ ڪري عوام پريشان آھي. ھنن چيو تي ٻيلي کاتي جو وڻ ثابت ٿيڻ تي واپاري يا آرا مشين مالڪ خلاف ڪيس داخل ڪيو وڃي، پر ذاتي يا سروي نمبر جا ڪاغذ ڏيکارڻ يا تصديق ڪرائڻ باوجود پوليس طرفان رشوت وٺڻ سراسر ظلم ۽ ناانصافي آھي، جنھن خلاف نوٽيس وٺڻ تائين اسان جو احتجاج جاري رھندو. ھنن وڏي وزير، آء جي سنڌ، ڊي آء جي لاڙڪاڻو ۽ ايس ايس پي لاڙڪاڻو کان مطالبو ڪيو ته پرائيويٽ وڻ وڪڻندڙن، ڪاٺ جي واپارين، بروڪرن ۽ آرا مشينن جي مالڪن کي تنگ ڪندڙ ايس ايڇ اوز ۽ پرائيويٽ گن مين خلاف ڪارروائي ڪري گم ڪيل ٽريڪٽر ڊرائيور شفقت ٻرڙو کي بازياب ڪرائي تحفظ فراھم ڪيو وڃي، ٻئي صورت ۾ سخت احتجاج ڪيو ويندو.