شرجیل انعام میمن کی الیکٹرک اور پنک ٹیکسی سروس منصوبوں پر تیز رفتار پیش رفت، ماحول دوست ٹرانسپورٹ نظام کے لیے کوششیں تیز

معروف ملٹی نیشنل الیکٹرک گاڑیاں بنانے والی کمپنی کے وفد نے شرجیل انعام میمن سے ان کے دفتر میں ملاقات کی

کراچی — شرجیل انعام میمن کی الیکٹرک اور پنک ٹیکسی سروس منصوبوں پر تیز رفتار پیش رفت، ماحول دوست ٹرانسپورٹ نظام کے لیے کوششیں تیز سندھ کے سینئر وزیر اور صوبائی وزیر اطلاعات، ٹرانسپورٹ اور ماس ٹرانزٹ شرجیل انعام میمن الیکٹرک ٹیکسی سروس اور پنک ٹیکسی سروس کے منصوبوں پر تیزی سے کام کرتے ہوئے صوبے میں جدید اور ماحول دوست ٹرانسپورٹ نظام کے قیام کے لیے اپنی کوششیں مزید تیز کر چکے ہیں۔ ایک معروف ملٹی نیشنل الیکٹرک گاڑیاں بنانے والی کمپنی کے وفد نے شرجیل انعام میمن سے ان کے دفتر میں ملاقات کی۔ ملاقات میں کمپنی کے نمائندوں نے سینئر وزیر کو اپنی الیکٹرک گاڑیوں کے ماڈلز، خصوصیات اور ٹیکنالوجی کے بارے میں تفصیلی بریفنگ دی۔ اس موقع پر سیکریٹری ٹرانسپورٹ اسد ضامن، سندھ ماس ٹرانزٹ اتھارٹی کے ایم ڈی کنول نظام بھٹو، اور ٹرانس کراچی کے سی ای او فواد غفار سومرو سمیت دیگر افسران بھی موجود تھے۔ اس موقع پر گفتگو کرتے ہوئے شرجیل انعام میمن نے کہا کہ سندھ حکومت پبلک پرائیویٹ پارٹنرشپ کے ذریعے ٹرانسپورٹ کے شعبے میں جدت لانا چاہتی ہے۔ سندھ میں الیکٹرک گاڑیوں کے استعمال کو فروغ دینا وقت کی ضرورت ہے تاکہ شہریوں کو صاف، محفوظ اور پائیدار سفری سہولیات میسر آ سکیں۔ انہوں نے کہا کہ ہم چاہتے ہیں کہ سندھ میں ایک مضبوط الیکٹرک ٹرانسپورٹ نظام قائم ہو۔ الیکٹرک گاڑیوں کے ساتھ ساتھ ان کی چارجنگ اسٹیشنز، مینٹیننس سینٹرز اور دیگر بنیادی انفراسٹرکچر کی تعمیر میں بھی سرمایہ کاری کے وسیع مواقع موجود ہیں۔ سینئر وزیر نے کہا کہ سندھ حکومت نجی شعبے کے ساتھ مل کر ایک ایسا فریم ورک تیار کر رہی ہے جو سرمایہ کاروں کو مکمل تعاون اور تحفظ فراہم کرے گا۔ انہوں نے کہا کہ سندھ حکومت نے سرمایہ کاروں کے لیے سازگار ماحول پیدا کیا ہے۔ دھابیجی اسپیشل اکنامک زون سرمایہ کاروں کے لیے ایک بہترین موقع ہے، جہاں انہیں دس سال کی ٹیکس چھوٹ سمیت کئی سہولیات فراہم کی جا رہی ہیں۔ شرجیل انعام میمن نے کہا کہ ہم چاہتے ہیں کہ زیادہ سے زیادہ بین الاقوامی کمپنیاں سندھ میں آئیں اور یہاں سرمایہ کاری کریں۔ سندھ حکومت ٹرانسپورٹ کے شعبے میں بین الاقوامی معیار کی خدمات متعارف کرانے کے لیے ہر ممکن مدد فراہم کرے گی۔ انہوں نے کہا کہ ہمارا مقصد ہے کہ کراچی سمیت سندھ کے تمام بڑے شہروں میں جلد از جلد الیکٹرک ٹیکسی سروس شروع کی جائے تاکہ عوام کو جدید اور ماحول دوست سفری سہولیات فراہم کی جا سکیں۔