نوجوان آرٽيفشل انٽيليجنس، سائنس، ميٿس ۽ ٻين علم ذريعي سنڌ کي بچائين. مستقبل کي بچائين: اياز لطيف پليجو

اياز لطيف پليجو خاص مهمان طور ڊاڪٽر زرتاب محمود ڪاتيار، ڊاڪٽر زرقا الھورايو ڪاتيار سميت 50 نياڻين کي ايوارڊ ڏنا

حيدرآباد(بيورو)ھيلٽن ونگز آف اينويشن پاران لطيف آباد حيدرآباد پاران ڇوڪرين جي حوصلا افزائي لاءِ سالياني ايوارڊ تقريب ۾ قومي عوامي تحريڪ جو سربراھ اياز لطيف پليجو مھمان خاص طور شرڪت ڪئي، بھترين ڪارگردي تي ڊاڪٽر زرتاب محمود ڪاتيار، ڊاڪٽر آف فارميسي زرقا الھورايو ڪاتيار سميت سنڌ جي 50 نياڻين کي ايوارڊ کي ايوارڊ ڏنا. ان موقعي تي ايوارڊ کي خطاب ڪندي قومي عوامي تحريڪ جي سربراھ ۽ ناليواري قانوندان اياز لطيف پليجي خطاب ڪندي چيو تہ تعليم سان ئي معاشري ۾ سجاڳي اچي ٿي. آئون سنڌ جي نياڻين ۽ نوجوانن کي اپيل ٿو ڪريان تہ ٽڪ ٽاڪ ۽ سوشل ميڊيا غير معياري سرگرمين تي وقت ضايع ڪرڻ بجاءِ علم حاصل ڪن، ڇو⁠تہ علم ئي بيداريءَ جو ذريعو آهي.اياز لطيف پليجي چيو تہ ھڪڙي قابل نوجوان، ھڪڙي باصلاحيت نياڻيءَ کان جڏھين سندس روزگار جو حق کسيو ٿا، انھن جي محنت ۽ ميرٽ جو سودو ڪيو ٿا تہ اھو صرف ان ھڪ فرد نہ سڄي خاندان جي مسقبل جو قتل آھي.اياز لطيف پليجي چيو تہ نوجوان علم ۽ ميرٽ سان سنڌ جون واڳون سنڀالين.سنڌ جا نوجوان اڪيڊمڪ پڙھائي سان گڏ ادب پڙھن، تاريخ پڙھن، شاعري پڙھن، سائنس پڙھن، ان سان اسين دنيا ۾ مٿانھين زندگي گذارينداسين. پاڻ کي ڌرتي ۽ انسانن سان جوڙينداسين. اڪيلا اڪيلا رڳو پئسن لاءِ نہ جيئنداسين. ادب ۽ تاريخ ڌرتي، سماج ۽ دنيا سان جوڙين ٿا.جيڪڏھن ٻولي نہ ھوندي، ڪلچر نہ ھوندو، ادب نہ ھوندو، موسيقي نہ ھوندي تہ اھي اندران کالي ھوندا، کوکلا ھوندا. اياز لطيف پليجي چيو تہ نوجوان سنڌ جو مستقبل آھن. آرٽيفشل انٽيليجنس، سائنس، ميٿس ۽ ٻين علم ذريعي سنڌ کي بچائين. مستقبل کي بچائين. بيڊ گورننس ۽ ڪرپشن سنڌ کي خطري ۾ آڻي ڇڏيو آھي.اياز لطيف پليجي ملڪ جي ڪا بہ يونيورسٽي عالمي معيار جي آھي تعليم، سائنس ۽ ترقي حڪمرانن جي ايجنڊا ناھي. ڪرپشن، ڦرلٽ، انساني حقن جون ڀڃڪڙيون ۽ ملڪ دشمن پاليسيون جوڙڻ دستور بنجي ويو آھي. اياز لطيف پليجي چيو تہ موجوده حڪمران پھريون ڀيرو اقتدار ۾ ناھن آيا، آھي ڪيترن ئي ڏهاڪن کان بار بار مسلط ڪيا ويا آهن، جنھن جو نتيجو آھي جو دنيا جي ٽاپ 350 يونيورسٽين ۾ پاڪستان جي هڪ بہ يونيورسٽي شامل ناهي. اياز لطيف پليجي چيو تہ ملڪ ۾ موجود يونيورسٽين ۽ تعليمي نظام جو سنڌ ۾ وڌيڪ ٻيڙو ڀڏل آھي. پنجاب ۽ اسلام آباد جون يونيورسٽيون ۽ اتي جو تعليمي نظام سنڌ کان تمام گھڻو بھتر ۽ اڳتي آھي. اياز لطيف پليجي چيو تہ سنڌ ۾ ھزارين اسڪول بند پيا آھن. يونيورسٽيز مان شاگردياڻين جا لاش ملن ٿا. سھولتون ناھن. تعليمي معيار ناھي. شاگرد ناانصافين جو شڪار آھن. ڪرپشن ۽ بدعنواني يونيورسٽين ۽ ڪاليجن جو ٻيڙو غرق ڪري ڇڏيو آھي. اياز لطيف پليجي چيو تہ سنڌ جا شاگرد پڙھڻ چاھين ٿا پر انھن لاء معياري لائبرريون ناھن. جيڪي لائبريريون موجود آھن انھن ۾ شاگردن جي ويھڻ جي گنجائش ناھي. تقريب ۾ مختلف علائقن مان آيل سماجي اڳواڻن، استادن ۽ شاگردن وڏي تعداد ۾ شرڪت ڪئي ۽ ايوارڊ حاصل ڪندڙ نياڻين کي ڀرپور داد ڏنو.