عوامي پريس ڪلب ملير ۽ ڪي يو جي ورڪرز جي سڏ تي احتجاجي مظاهرو

ڪراچي، خاص طور تي ضلع ملير ۾ ڏوهن جو گراف خطري واري حد تائين وڌي ويو آهي: اڳواڻ

ملير (رپورٽ: عبدالرشيد مورجھريو) ملير ضلعي ۾ صحافين تي لڳاتار ٿيندڙ حملن ۽ لوٽ مار جي واقعن خلاف عوامي پريس ڪلب ملير ۽ ڪي يو جي ورڪرز جي سڏ تي عوامي پريس ڪلب آڏو احتجاجي مظاهرو ڪيو ويو، جنهن جي اڳواڻي سامي ميمڻ، عنائت شاهه، فاروق بنگوار، طارق سهتو، حفيظ سيال، آصف سدھو، حق نواز سومرو ۽ نادر وسير ڪئي. مظاهري ۾ صحافين سان گڏ سياسي ڪارڪنن ۽ سماجي اڳواڻن به وڏي تعداد ۾ شرڪت ڪئي. مظاهري دوران شرڪائن هٿن ۾ بينر ۽ پلي ڪارڊ کنيا پيا هئا جن تي "صحافين تي حملا نامنظور" ۽ "صحافين سان لوٽ مار نامنظور" جا نعرا لکيل هئا مقررّن ۾ امام الدين کوکر، نظير بهار وڌيو ، فدا پهنور، انور لاشاري ۽ شههنشاهه چارڻ خطاب ڪندي چيو ته ڪراچي، خاص طور تي ضلع ملير ۾ ڏوهن جو گراف خطري واري حد تائين وڌي ويو آهي، عام شهرين سان گڏ هاڻي صحافي به محفوظ ناهن رهيا. انهن ٻڌايو ته ڪالا بورڊ جي ڀرسان خانگي ٽي وي اينڪر امتياز مير جي گاڏي تي هٿياربندن فائرنگ ڪئي جنهن سبب هو سخت زخمي ٿي اسپتال ۾ داخل آهي. ساڳي ڏينهن عوامي پريس ڪلب جي سينيئر صحافي طارق سهتو کي قائدآباد پل جي ويجهو گهرڀاتين سان گڏ روڪي نقدي، موبائل فون ۽ قيمتي سامان لوٽي ورتو ويو، جڏهن ته ڊفينس ۾ ڪي يو جي جي ميمبرن صحافي بشارت شاهه ۽ جاويد ابدالي به هٿياربندن هٿان لٽيا ويا.مقررّن جو چوڻ هو ته متاثر صحافين فوري طور تي پوليس کي اطلاع ڏنو، پر تاحال ڪنهن به واقعي ۾ ڪابه ڪارروائي نه ٿي آهي، جيڪا انتهائي ڳڻتي جوڳي ڳالهه آهي. مظاهرين مطالبو ڪيو ته صحافين تي ٿيندڙ حملا ۽ لوٽ مار ۾ ملوث جوابدارن کي فوري گرفتار ڪري لوٽيل سامان واپس ڪرايو وڃي ۽ صحافين کي تحفظ ڏيڻ لاءِ مؤثر قدم کنيا وڃن ته جيئن هو آزاد ۽ محفوظ ماحول ۾ پنهنجو پيشو جاري رکي سگهن.