گڏاپ سٽي لڳ ڪانجي ڀيل ڳوٺ ۾ برسات متاثر بي يارو مددگار بڻيل، مينارٽي اتحاد ملير جا اڳواڻن سندن داد رسي لاءِ پهتا

مينارٽي اتحاد ملير جي اڳواڻن سنتوش ڪمار ڀيل، راجيش مهيشوري ۽ ٻين پاران متاثرن سان ملاقات

ملير (رپورٽ: عبدالرشيد مورجھريو) ضلعي ملير جي گڏاپ سٽي لڳ ڪانجي ڀيل ڳوٺ ۾ تيز برسات سبب ڪيترائي ڪچا گهر ڪري پيا هئا جنهن سبب ڳوٺاڻا کليل آسمان هيٺ بي يارو مددگار ٿي ويا ڳوٺ جي مردن، عورتن ۽ ٻارن لاءِ پناهه جا مسئلا پيدا ٿي ويا آهن واقعي جي اطلاع ملندي ئي ملير مينارٽي اتحاد جي اڳواڻن سنتوش ڪمار ڀيل، راجيش مهيشوري، همير داس، گيان چند، رامچند ۽ موهن لال متاثر ڳوٺ جو دورو ڪيو ۽ برسات سبب ڊهي پٽ ٿيل گهرن جو معائنو ڪيو. هنن ڳوٺاڻن سان ملاقات ڪري سندن حال احوال پڇيو ۽ سندن مصيبت ۾ ساڻس بيهڻ جو يقين ڏياريو اقليتي اڳواڻن چيو ته برساتي پاڻي ۽ گهر ڊهڻ ڪري غريب ڳوٺاڻا سخت تڪليفن کي منهن ڏئي رهيا آهن. ڪيترن ئي خاندانن وٽ رهڻ لاءِ ڪو جاءِ نه رهيو آهي، جڏهن ته عورتون ۽ ٻار کليل آسمان هيٺ ويٺل آهن. هنن چيو ته سنڌ حڪومت کي گهرجي ته فوري طور متاثر ڳوٺاڻن لاءِ ايمرجنسي مدد فراهم ڪري، کين خيمه، کاڌ خوراڪ ۽ صاف پاڻي مهيا ڪيو وڃي ملير مينارٽي اتحاد جي اڳواڻن وڌيڪ چيو ته حڪومت کي گهرن جي ٻيهر تعمير جو انتظام به ڪرڻ گهرجي، ڇو ته غريب ڀيل برادري جا ماڻهو پنهنجي وسيلن سان گهر ٻيهر ٺاهي نه ٿا سگهن. هنن زور ڀريو ته ضلعي انتظاميا ۽ سنڌ حڪومت فوري طور تي بحالي جو ڪم شروع ڪري ۽ متاثرن کي هر ممڪن رليف ڏنو وڃي.مقامي ماڻهن چيو آهي ته هر سال برسات سبب ڳوٺ جا ڪچا گهر متاثر ٿين ٿا، پر هن ڀيري وڏي تباهي آئي آهي، جنهن کان پوءِ هو مدد لاءِ سنڌ حڪومت ۽ سماجي تنظيمن ڏانهن اپيل ڪري رهيا آهن.