گرينڊ ھيلٿ الائنس شڪارپور جي سڏ تي سنڌ ايمپلائيز الائنس جو اجلاس ٿيو, اڄ کان آفيسون، اسپتالون اسڪول بند رکيا ويندا: فيصلو

اڄ کان 27 سيپٽمبر تائين شڪارپور سميت پوري سنڌ ۾ اسپتالون، اسڪول ۽ آفيسون بند رکيا ويندا: اڳواڻ

شڪارپور (احسان ابڙو)گرينڊ ھيلٿ الائنس شڪارپور جي سڏ تي سنڌ ايمپلائيز الائنس (SEA) جي مرڪزي ۽ صوبائي اڳواڻن جي صدارت ۾ ڊي ايڇ او آفيس شڪارپور ۾ اھم اجلاس منعقد ٿيو، جنھن ۾ مرڪزي، صوبائي ۽ ضلعي سطح جا اڳواڻ وڏي تعداد ۾ شرڪت ڪئي اجلاس ۾ صوبائي صدر پي ٽي الف سنڌ غلام رسول مھر، صوبائي صدر آپڪا سنڌ مقبول حسين مھر، صوبائي چيئرمين عبدالرحمان شر بلوچ، ضلعي چيئرمين سيد راشد حسين شاھ، ضلعي صدر پي ايم اي سيد اطهر علي شاھ، عبدالوهاب ڪاغذي، شمس الحق ابڙو، نوشاد علي ڀٽو، فھيم احمد سومرو، عبدالرحمان جتوئي، عبدالسميع جوڻيجو، مجاھد حسين لانگاھ، ميڊيم روبينه عباسي ۽ ٻين شرڪت ڪري مڪمل حمايت جو اعلان ڪيو. اجلاس جا اهم فيصلا مرڪزي حڪم تي 23 سيپٽمبر کان 27 سيپٽمبر 2025 تائين شڪارپور سميت پوري سنڌ ۾ اسپتالون، اسڪول، ڪاليج، يونيورسٽيون، روينيو آفيسون ۽ سمورا سرڪاري ادارا مڪمل طور بند رکيا ويندا. 06 آڪٽوبر 2025 تي بلاول هائوس ڪراچي آڏو ميگا پروٽيسٽ ڪيو ويندو، جيڪو مطالبن جي مڃتا تائين جاري رهندو. احتجاجي تحريڪ مرحليوار جاري رهندي ۽ حقن جي منظوري تائين ختم نه ٿيندي. اڳواڻن خطاب ڪندي چيو ته پينشن ۾ ڪٽوتي ملازمن جو معاشي قتل آھي، DRA، گروپ انشور، بينيوولنٽ ۽ فوتي ڪوٽا جي بحالي جهڙا جائز مطالبا نظرانداز ٿيڻ برداشت نه ڪبا.اجلاس ۾ صوبائي صدر پي ٽي الف غلام رسول مھر، صوبائي صدر آپڪا مقبول حسين مھر، سيد راشد حسين شاهه ۽ ٻين پنھنجي خطاب م چيو ته پوري سنڌ جا ملازم سراپا احتجاج آهن ۽ ملازمن ۾ شديد بيچيني ۽ مايوسي پکڙيل آهي. پاڪستان پيپلز پارٽي روٽي ڪپڙا ۽ مڪان جو نعرو ھڻي ملازمن ۽ عوام جو معاشي قتل ڪري رھي آھي. اسانجي تحريڪ مرحليوار جاري رهندي جيستائين سنڌ ايمپلائيز الائنس (SEA) جا جائز مطالبا منظور نه ڪيا وڃن. پينشن ۽ بنيادي معاشي حقن لاءِ اسان آخري قطريءَ تائين جدوجهد ڪنداسين هيءَ جنگ تڏهن تائين جاري رهندي جيستائين حقن جي فتح حاصل نه ٿئي. 06 آڪٽوبر تي ڪراچي ۾ بلاول ڀٽو زرداري جي گهر آڏو ٿيندڙ ميگا احتجاج ۾ وڏي تعداد ۾ شرڪت ڪري اتحاد ۽ تنظيم جو ثبوت ڏين.