سیکیورٹی گاڑی کا چالان، مریم نواز کے بیٹے کا ردعمل سامنے آگیا

لاہور (ویب ڈیسک) ٹریفک قوانین کی خلاف ورزی پر پنجاب کی وزیراعلیٰ مریم نواز کے بیٹے جنید صفدر کی سیکیورٹی پر مامور گاڑی کا چالان کیا گیا، جس پر جنید صفدر کا ردعمل بھی سامنے آگیا ہے۔ 7 جولائی کو جنید صفدر کی سیکیورٹی پر مقرر گاڑی کو کالے شیشے لگے ہونے کی وجہ سے ٹریفک پولیس نے چالان کیا۔ جنید صفدر نے منگل کے روز اپنی انسٹاگرام اسٹوری کے ذریعے کہا کہ: ”جن اہلکاروں نے میری گاڑی کو روکا اور قانون کے مطابق چالان کیا، میں ان کے پیشہ ورانہ رویے سے متاثر ہوا ہوں، اللہ ان کی ڈیوٹی کے دوران اور ڈیوٹی کے بعد حفاظت فرمائے۔“ دوسری جانب وزیراعلیٰ پنجاب مریم نواز نے بھی اس کارروائی پر پولیس ٹیم کی تعریف کرتے ہوئے کہا کہ: ”قانون کی پاسداری ہی ہماری حکومت کی پہچان ہے، میں پورے پنجاب میں قانون کا یکساں نفاذ دیکھنا چاہتی ہوں۔“ وزیراعلیٰ نے ٹریفک پولیس کے انچارج شاہ زیب اور اہلکاروں پرویز، حیدر اور مجاہد کو شاباش دیتے ہوئے کہا کہ: ”آپ نے قانون پر عملدرآمد کو یقینی بنایا۔“ واضح رہے کہ ٹریفک وارڈن نے معمول کی چیکنگ کے دوران جنید صفدر کی سیکیورٹی پر موجود گاڑی کو روکا اور ضوابط کی خلاف ورزی پر قانونی کارروائی کی تھی۔