ٺٽو: جنگشاهي ويجهو ڳوٺ حاجي کينئرو جوکيو باشار جو اسڪول ورهين کان بند پيل

اسڪول ڪافي وقت کان بند هجڻ ڪري ٻارڙا تعليم کان محروم بڻجي رھيا آھن، نوٽيس ورتو وڃي: ڳوٺاڻا

ٺٽو(شفيق ڀٽي)جنگشاهي ڪوهستان ست ڀاڱي چار جي ڳوٺ حاجي کينئرو جوکيو باشار جو اسڪول ڪيترن ئي سالن کان بند ھجڻ ڪري اتان جا معصوم ٻارڙا تعليم جهڙي زيور کان محروم بڻجي ويا، معصوم ٻارڙن جو ڳوٺ جي نوجوانن سان گڏ اسڪول اڳيان احتجاجي مظاھرو، فورن بند ٿيل اسڪول کي کولرائي اسڪول تي استاد مقرر ڪري ٻارڙن کي تعليم ڏيارڻ جو مطالبو ڪري ڇڏيو آھي، ان سلسلي ۾ ڳوٺ حاجي کينئرو جوکيو جي ڪيترن ئي تعليم کان محروم ٿيندڙ معصوم ٻارڙن پنھنجي ڳوٺ جي نوجوانن سان گڏ بند ٿيل اسڪول بلڊنگ آڏو اسڪول کولرايو ٻار پڙهايو جا زوردار نعرا ھڻندي غلام نبي جوکيو، فقير علي نواز جوکيو، پرويز جوکيو، جمال الدين جوکيو، راشد جوکيو، عالم جوکيو چيو تہ سندن اسڪول ڪافي وقت کان بند ٿيڻ ڪري سندن ٻارڙا تعليم کان محروم بڻجي رھيا آھن، ھنن چيو تہ سنڌ حڪومت ھن واري جيڪي نوان استاد مقرر ڪيا اھن، اھي بند ٿيل اسڪولن تي ناھن مقرر ڪيا، انھن کي انھن اسڪولن تي مقرر ڪيو ويو اھي، جتي اڳ ۾ ئي استاد مقرر ٿيل اھن، ھنن چيو تہ اسان پنھنجي بند ٿيل اسڪول کي کولرائي استاد مقرر ڪرڻ لاء ڪافي ڪوششون ڪيون آھن، پر اسانجي دانھن تي ڪير بہ ڌيان ڏيڻ لاء تيار ناھي، ھنن وزير اعلىٰ سنڌ، صوبائي وزير تعليم، سيڪريٽري تعليم، ايم پي اي صوبائي وزير سيد رياض حسين شاه شيرازي، ايم اين اي صادق علي ميمڻ سميت سمورن وس وارن کان گھر ڪئي ته فورن هن جديد دور ۾ سندن بند ٿيل اسڪول کي کولرائي استادن کي مقرر ڪري سندن معصوم ٻارڙن کي تعليم جي زيور سان آراستہ ڪري سندن مستقبل سنواري کين جهالت جي زندگي مان نجات ڏياري وڃي.