ملير: آسو ڳوٺ ۾ سعید غنی پاران فٽبال اسٽيڊيم جو افتتاح، "ڪي فور" منصوبي جو افتتاح 14 آگسٽ تي ٿيندو

ملير (رپورٽ: عبدالرشيد مورجھريو) صوبائي وزير ۽ پاڪستان پيپلز پارٽي جي سينيئر اڳواڻ سعيد غني ملير سٽي جي آسو ڳوٺ ۾ ملير يونين فٽبال اسٽيڊيم جو افتتاح ڪيو جنهن جي تقريب ڪئي وئي، جنهن ۾ علائقي جي معزز شهرين، پارٽي ڪارڪنن ۽ وڏي انگ ۾ ماڻهن شرڪت ڪئي.تقريب کي خطاب ڪندي سعيد غني اعلان ڪيو ته ڪراچي لاءِ پاڻي جو اهم منصوبو ڪي فور 14 آگسٽ تي افتتاح هيٺ آندو ويندو. هن ٻڌايو ته منصوبي جي ٽن واٽر لائينن جو ڪم اڳ ئي مڪمل ٿي چڪو آهي، جڏهن ته مڪمل ٿيڻ لاءِ وڌيڪ 70 ارب رپين جي ضرورت آهي.سعيد غني چيو ته اڳوڻي تحريڪ انصاف حڪومت هي منصوبو روڪرايو، جيڪو هاڻوڪي سنڌ حڪومت ٻيهر بحال ڪيو آهي.هن چيو ته شاهراهه ڀٽو هڪ اهم روڊ رٿا آهي، جيڪا چار ضلعن کي پاڻ ۾ ڳنڍي ٿي ۽ ان جي تڪميل سان ٽريفڪ جا مسئلا حل ٿي سگهن ٿا. جڏهن ته قائدآباد پل جي تعمير پڻ جلد مڪمل ڪئي ويندي، جيڪا رهواسين لاءِ آمد و رفت ۾ آسانی آڻيندي. صوبائي وزير جو چوڻ هو ته پاڪستان پيپلز پارٽي کي ملير مان هميشه عوام جي ڀرپور حمايت ملي آهي، ڇو ته هتي ترقياتي ڪم لڳاتار جاري آهن. هن چيو ته سنڌ حڪومت سنجيدگيءَ سان مختلف شعبن ۾ عوامي ڀلائي جا منصوبا هلائي رهي آهي. سعيد غني قومي دفاع تي ڳالهائيندي چيو ته جيڪڏهن ڀارت سان جنگ ٿئي ٿي ته پاڪستاني فوج دشمن کي هر ميدان تي شڪست ڏيڻ جي صلاحيت رکي ٿي. هن چيو ته اسان اڄ فتح جو جشن ملهائي رهيا آهيون، جڏهن ته پرڏيهي وزير بلاول ڀٽو زرداري عالمي سطح تي ڀارت کي بي نقاب ڪيو آهي. سعيد غني موجب هن سال ملڪ ۾ آزادي جي ڏهاڙي جي حوالي سان شاندار تقريبون منعقد ٿينديون.