ڏوڪريءَ ۾ سونارڪي دڪان مان هٿيارن جي زور تي لکين رپين جو ڌاڙو

هٿياربند سوناري اجيت ڪمار جي دڪان ۾ گهڙي هٿيارن جي زور تي 8 لک روڪ ۽ 15 تولا سون ڦري ويا

ڏوڪري (اطهر ميمڻ) ڏوڪريءَ ۾ ڦر جون وارداتون تيز، هٿياربندن سوناري کان 15 تولا سون ۽ 8 لک رپيا روڪ رقم ڦري ويا، ان کان اڳ به ڪيتريون ئي ڦر جون وارداتون ٿي چڪيون، هڪ واپاري ڦورن جي فائرنگ ۾ مارجي پڻ چڪو آهي. هن وقت تائين ڪنهن به واردات جا مک جوابدار گرفتار نه ٿيا آهن. ڏوڪري۾ امام بارگاهه گهٽي واري بازار مان هٿياربندن جي وڏي ڦر، موٽر سائيڪلن تي سوار 6 هٿياربند اجيت ڪمار نالي سوناري جي دوڪان تي ڌاڙو هڻي 15 تولا سون، 8 لک رپيا روڪ رقم ۽ ٻيو قيمتي سامان هٿ ڪري فرار ٿي ويا آهن.متاثر سوناري اجيت ڪمار صحافين سان ڳالهائيندي ٻڌايو ته هو دوڪان تي ويٺو هو ته اوچتو ٻن موٽر سائيڪلن تي سوار هٿياربند دوڪان ۾ گهڙي آيا، جن کيس هٿيارن جي زور تي يرغمال بڻائي ڦر جي واردات ڪئي. اجيت موجب ڦورن وٽ جديد هٿيار هئا، جن جي ڏهڪاءَ سبب هو ڪجهه به نه ڪري سگهيو.واردات بابت ڏوڪري ٿاڻي تي اطلاع ڏنو ويو، جنهن بعد پوليس واقعي واري هنڌ پهچي معائنو ڪيو. پوليس موجب واقعي جي جاچ جاري آهي ۽ جلد نتيجا سامهون آڻڻ جي ڪوشش ڪئي ويندي.ياد رهي ته ڏوڪريءَ ۾ ڪجهه وقت کان ڦرن جون وارداتون عام ٿي ويون آهن. ان کان اڳ اٽي چڪيءَ جي مالڪ شفقت ڀنڊ، ڊيلر راشد قائمخاني ۽ ڪار آٽوز جي واپاري سونل چنو کان به ڦر جون وارداتون ٿي چڪيون آهن، جڏهن ته واپاري سونل چنو هڪ واردات دوران ڦورن جي فائرنگ ۾ زخمي ٿي فوت ٿي ويو هو، جنهن جو مک جوابدار اڃا تائين پوليس جي پڪڙ کان ٻاهر آهي.شهرين پاران ڏوڪري ۾ وڌندڙ ڏوهارين سرگرمين تي ڳڻتي جو اظهار ڪندي چيو آهي ته ڏوڪريءَ جو امن بحال ڪرڻ ۾ ڏوڪري پوليس ۽ ٻيا ادارا ناڪام رهيا آهن، هنن مطالبو ڪيو آهي ته امن امان جي صورتحال کي بهتر بڻائڻ لاءِ سنجيده قدم کنيا وڃن