رتيديري ۾ جسقم جساف پاران نينگري سان لڄالٽ واري واقعي خلاف احتجاج

views | 07th May 2023 • سنڌي خبرون

شفيع محمد رند درندگيءَ جي انتها ڪندي نينگري کي اغوا بعد لڄالٽ جو نشانو بڻايو: اڳواڻ

رتوديرو (رپورٽر) رتيديري جي نادر شاه پاڙي مان 3 ڏينهن اڳ زبردستي اغوا ڪري حوس جو نشانو بڻايل نينگري سائرا شيخ واري واقعي خلاف جسقم چيئرمين صنعان خان قريشي جي هدايتن تي ناري کي انصاف ڏيارڻ لاءِ جيئي سنڌ قومي محاذ ۽ جيئي سنڌ اسٽوڊنٽس فيڊريشن جي ڪارڪنن پاران احتجاجي مظاهرو ڪري نعريبازي ڪئي وئي مظاهرين آصف اوڍو ، اسد کوکر ، علي رضا عارباڻي ، سجاد خاصخيلي ، انصار چنو ، عبدالرحمٰن قريشي ، سميع گھانگھرو ، ضامن قريشي ۽ ٻين جي اڳواڻي ۾ شهر جي مک روڊن رستن تان ٿيندا رتوديرو پريس ڪلب پهتا جتي ميڊيا سان ڳالهائيندي اڳواڻن چيو ته وحشي جوابدار شفيع محمد رند درندگيءَ جي انتها ڪري ڇڏي آهي هن معصوم ناري کي اغوا ڪرڻ بعد ساڻس زبردستي پنهنجي حوس جو نشانو بڻائي انسانيت جو ڪنڌ شرم کان جھڪائي ڇڏيو آهي هنن چيو ته رتوديرو شهر هاڻي مڪمل طور تي غير محفوظ بڻجي ويو آهي جتي نياڻين جون عزتون به محفوظ ناهن رهيون هنن چيو ته غريب خاندان سان تعلق رکندڙ هن نينگري سان ظالم ظلم ڪري سندس جي زندگي تباه ڪري ڇڏي آهي مظاهرين اعليٰ اختيارين کان مطالبو ڪندي چيو ته گرفتار ڪيل جوابدار کي سخت کان سخت سزا ڏئي متاثر نينگري ۽ ان جي وارثن سان انصاف ڪيو وڃي نه ته بي صورت ۾ اڃا به سخت احتجاج ڪيا ويندا