سجاول ۾ به ڪشميري ڀائرن سان يڪجهتي جي اظهار لاءِ ريليون ڪڍيون ويون

سجاول (گلشيرميربحر)ڊسٽرڪٽ ايڊمنسٽريشن , ضلع انتظامه سجاول , بيورو سپلاءِ پرائسز، ايجوڪيشن, هوميو رائيٽس، ڊفينڊرز آف پاڪستان مومينٽ ڊسٽرڪٽ سجاول طرفان ڪشميري مظلوم ڀائرن سان اظهار يڪجهتي طور ريلي ڪڍي وئي، گورنمينٽ هاءِ اسڪول سجاول کان پبلڪ پارڪ تائين ڪڍي وئي جنهن ۾ مختلف کاتن جي آفيسرن، اُستادن، شاگردن، سول سوسائٽي ۽ مختلف اين جي اوز جي نمائندن وڏي انگ ۾ شرڪت ڪئي. ريلي ۾ شريڪ ماڻهن جي هٿن ۾ ڀارت جي غيرقانوني قبضي ۽ والاريل ڪشمير ۾ انساني حقن جي سنگين ڀڃڪڙين ۽ غيرقانوني قدمن جي مذمت بابت هٿن ۾ بينر ۽ پاڪستاني جھنڊا کڻي مودي سرڪار خلاف سخت نعري بازي ڪئي ان موقعي تي ريلي کي خطاب ڪندي اڳواڻن اي ڊي سي ون حبيب الله وڳڻ , خليل احمد سميجو، ولي محمد ڀٽي، عبدالحميد کٽي، عبدالرشيد ميمڻ،طفيل ٽيمڙو، عبدالجبار شيخ، اسماعيل سرويچ، قادر ڀٽي، بابو پٺاڻ، جاني جوڳي، سليم ملاح محمد جمن ملاح۽ ٻين چيو ته ڪشميرين سان يڪجهتي جي اظهار لاءِ پاڪستانين جو وڏو انگ ٻاهر نڪتو آهي، چئني صوبن ۾ تقريبون منعقد ڪيون پيون وڃن، ڪشمير کي هر صورت ۾ آزادي ملندي. هنن چيو ته ڪشميرين تي ظلم جاري آهي، ڀارت خطي ۾ پنهنجي غير قانوني ڪاررواين ذريعي عالمي قانونن، ڪشميري عوام جي امنگن ۽ ڄمون ۽ ڪشمير بابت گڏيل قومن جي سلامتي ڪائونسل جي قراردادن جي مڪمل ڀڃڪڙي ڪري رهيو آهي. هنن وڌيڪ چيو ته ڀارت چاهي ٿو ته والاريل ڪشمير ۾ مسلمانن جي اڪثريت کي اقليت ۾ تبديل ڪيو وڃي، پاڪستاني ڪشميرين سان گڏ هئا ۽ هميشه گڏ هوندا.