شڪارپور پوليس مقابلو، 20 لک انعام يافته ڌاڙيل زخمي حالت ۾ گرفتار

گرفتار ٿيل ڏوھاري جي سڃاڻپ شريف عرف ٽڪي لولائي جي نالي سان ٿي آهي: ايس ايس پي شاهزيب چاچڙ

شڪارپور (احسان ابڙو) شڪارپور پوليس مقابلو، ڌاڙيلن جي زمين تنگ، 20 لک جي انعام يافته ڌاڙيل زخمي حالت ۾ گرفتار ، ايس ايس پي شاهزيب چاچڙ جو چوڻ هو ته گرفتار ٿيل ڏوھاري جي سڃاڻپ شريف عرف ٽڪي لولائي جي نالي سان ٿي آهي. گرفتار ٿيل ڏوھاري قتل، ڦر، چوري ۽ رھزني سميت 12 سنگين ڪيسن ۾ گهربل/ملوث آهي. ايس ايس پي شڪارپور وڌيڪ چيو ته جوابدار کي اڄ منجهند بڊي پوليس ٿاڻي جي حد ۾ ڳوٺ سومراڻي وڌيو ويجهو مقابلي دوران زخمي حالت ۾ گرفتار ڪيو ويو. ڏوھاري کي گرفتار ڪرڻ لاءِ نيو فوجداري ٿاڻي جي ايس ايڇ او خليل احمد رند تي مشتمل هڪ خاص ٽيم جوڙي وئي هئي.گرفتار ٿيل ڏوھاري انتهائي خطرناڪ ۽ علائقي ۾ خوف جي علامت سمجهيو ويندو هو. گرفتار ٿيل ڏوھاري جو ڪرمنل رڪارڊ موجب مٿس ڪيس داخل ٿيل آهن، ڏوھاري چاھي ڪٿي به روپوش ٿي وڃي پر قانون جي گرفتاري کان بچي نٿو سگهي. ايس ايس پي شاهزيب چاچڙ پاران نيو فوجداري ٿاڻي جي پوليس کي سٺي ڪارڪردگي تي شاباش ڏني.