ٺٽي ۾ عوامي تحريڪ پاران سنڌ جي عظيم ڏاهي رسول بخش پليجو جي سالگرهه ملهائي وئي

عوامي تحريڪ طرفان رسول بخش پليجي جي آخري آرامگاهه تي تقريب منعقد، قومي ۽ انقلابي گيتن سان ڀيٽا پيش

ٺٽو(ڊ ر) عوامي تحريڪ جي سربراهه رسول بخش پليجي صاحب جي 95هين سالگره، عوامي تحريڪ ضلعي ٺٽي طرفان رسول بخش پليجي صاحب آخري آرامگاهه تي تقريب منعقد ڪري قومي ۽ انقلابي گيتن سان ڀيٽا پيش ڪئي وئي. اڳواڻن گلن جي چادر چاڙهي سنڌي قوم جي قائد کي سلامي ڏني. سالگرہ تقريب ۾ سنڌياڻي تحريڪ جي عورتن به وڏي انگ ۾ شرڪت ڪئي. نون ڪئنالن ۽ سنڌ جي زمينن تي قبضن خلاف سخت نعريبازي پڻ ڪئي وئي. ڪينجهر ۽ هاليجي ڍنڍ تي قبضن خلاف به نعريبازي ڪئي وئي. ان موقعي تي خطاب ڪندي.ادي حورنسا۽ پليجو، علي محمد پرويز، مٺا خان لاشاري، شاه محمد چانگ، الله بخش بلوچ، عزيز ميمڻ، سلمه لاشاري، دريا خان زنور ھاري تحريڪ، خالق گندرو، انور پالاري، بلاول لاشاري، گھنور خان زنور، غلام علي زنور SST، حميد خشڪ SBT، عزيز ميمڻ، مارو خشڪ، پليجو صاحب جي فرزندن جميل پليجو، سليم پليجو، مسعود پليجو، رياض عباسي۽ ٻين چيو ته رسول بخش پليجو صاحب سنڌو درياهه جو وڪيل هو، سنڌو درياهه جا وهڪرا روان دوان رکڻ لاءِ هن سنڌ جي جهر جهنگ ۾ سجاڳي ڦهلائي، ڪالا باغ ڊيم خلاف ۽ ٻين اهم مسئلن تي پليجي صاحب جي اڳواڻي ۾ عوامي تحريڪ ۽ سنڌياڻي تحريڪ لانگ مارچون ڪيون، اڳواڻن چيو ته پليجو صاحب سنڌ جو محافظ هو، هن سنڌو درياهه جو شاندار ڪيس وڙهيو، پليجي صاحب سنڌ جي حقن جي حاصلات لاءِ گهڻ طرفي جدوجهد ڪئي، اڄ به هن جون تقريرون ۽ لکڻيون سنڌي عوام کي همٿ ۽ حوصلو ڏئي رهيون آهن، اڳواڻن چيو ته رسول بخش پليجي صاحب جو فڪر سنڌي عوام لاءِ نجات جو فڪر آهي. پليجي صاحب جي جوڙيل عوامي تحريڪ ۽ سنڌياڻي تحريڪ سنڌ جي اهم مسئلن تي پليجي صاحب جيان جدوجهد ۾ سڀ کان اڳڀري آهي. عوام جي جدوجهد جي صورت ۾ رسول بخش پليجو اڄ به زنده آهي. اڳواڻن وڌيڪ چيو ته ڇهه نون ڪئنالن جا منصوبا سنڌي عوام ڪنھن به صورت ۾ برداشت نه ڪندو، ڇهه نون ڪئنال سنڌو درياهه سڪائڻ جي سازش آهن، پيپلز پارٽي هن سازش ۾ وفاقي سرڪار سان ڀاڱي ڀائيوار آهي، ڪرائيم پارٽنر آهي، صدر زرداري ڇهه نون ڪئنالن جي منظوري ڏئي آئين ٽوڙيو آهي. اڳواڻن مطالبو ڪيو ته ڇهه نون ڪئنالن جا منصوبا ختم ڪري سنڌ کي سنڌ جي حصي جو پاڻي ڏنو وڃي ۽ ڪارپوريٽ فارمنگ جي نالي ۾ سنڌ جي زمينن تي قبضا ڪرڻ جو سلسلو بند ڪيو وڃي، گرين ڪارپوريٽ انيشيٽو پرائيويٽ لميٽيڊ ڪمپني کي ڏنل سنڌ جون زمينون واپس وٺي، زمينون مقامي بي زمين هارين ۾ ورهايون وڃن. هنن چيو ته ڪينجهر ڍنڍ کي به منڇر جيان تباهه ڪيو پيو وڃي، پاڻيءَ کي آلودو ۽ زهريلو بڻايو پيو وڃي.