ڪورنگي ۾ سنڌ فوڊ اٿارٽي جي ڪارروائي، هڪ گودام سيل

سنڌ فوڊ اٿارٽي جي ويجيلنس ٽيم محبوب ڀٽي جي نگراني ۾ مهراڻ ٽائون ۾ انٽرنيشنل برانڊ ڊسٽريبيوٽر جي گودام تي ڇاپو هنيو

ڪراچي (اسٽاف رپورٽر) سنڌ فوڊ اٿارٽي جي ويجيلنس ٽيم محبوب ڀٽي جي نگراني ۾ ڪورنگي ضلعي جي علائقي مهراڻ ٽائون ۾ هڪ انٽرنيشنل برانڊ ڊسٽريبيوٽر جي گودام تي ڇاپو هنيو جتي سنگين ڀڃڪڙيون سامهون آيون. تفصيل موجب جاچ دوران وڏي مقدار ۾ ايڪسپائر۽ خراب ٿيل سامان هٿ ڪيو ويو. هٿ آيل سامان ۾ الديوا چاڪليٽ جا 27 هزار پيڪيٽ، هرنيلا ماکي جون 660 بوتلون، هوتسا زيتون جو تيل جون 930 بوتلون ۽ نيچر هوم پينٽ بٽر جون 400 بوتلون شامل. ڊائريڪٽر جنرل سنڌ فوڊ اٿارٽي مزمل حسين هاليپوٽو آپريشن بابت ٻڌايو ته گودام جي حالت انتھائي خراب ھئي. معائني دوران مئل ڪوئا پڻ گودام ۾ چاڪليٽ ۽ ٻين شين ڀرسان پيل ھئا. گودام ۾ جراثيم ڪش قدمن جي کوٽ هئي. گودام ۾ ھاڃيڪار خوراڪ جي فراهمي تک سنڌ فوڊ اٿارٽي گودام سيل ڪري 5 لک رپيا ڏنڊ لاڳو ڪري ڇڏيو. ڊائريڪٽر جنرل سنڌ فوڊ اٿارٽي مزمل حسين هاليپوٽو وڌيڪ چيو ته عوام جي صحت سان کيڏندڙن کي ڪنهن به صورت ۾ معاف نه ڪيو ويندو. محفوظ خوراڪ جي فراهمي کي يقيني بڻائڻ لاءِ آپريشن جاري رهندو. هن وڌيڪ چيو ته فوڊ اٿارٽي جون ٽيمون سڄي سنڌ ۾ سرگرم آهن ۽ عوام جي صحت جي اصولن تي عمل ڪندي.