ڊي سي آفيس ٺٽو ۾ معذورن کي نوڪريون نٿيون ملن: سڪندر ڀٽي

ڪرپٽ مافيا معذورن جي نوڪرين ۾ وڏي رنڊڪ بڻيل آهي: رحيم بخش بروهي

ٺٽو (محمد شفيق ڀٽي)ٺٽي ضلعي جي رھواسي ، معذورن جي حقن لاءِ جاکوڙيندڙ سڪندر علي ڀٽي ۽ رحيم بخش بروهي عوامي پريس ڪلب ٺٽو ۾ پريس ڪانفرنس ڪندي الزام مڙهيو آھي تہ ڊي سي آفيس ٺٽو ۾ موجود ڪرپٽ مافيا اسان معذورن جي نوڪرين ۾ وڏي رڪاوٽ بڻيل آھي ھنن جو چوڻ ھو ته سال 2022 ۾ سپريم ڪورٽ واضع حڪم ڏنو ۽ 112ماڻھن جي لسٽ به جاري ڪئي جنھن تحت اسان کي معذور ڪوٽا مان نوڪريون ملڻيون ھيون پر ان وقت جي ڊي سي ٺٽو فقط انھن چئن ماڻھن کي نوڪريءَ جا آرڊر جاري ڪيا جيڪي ان ڪيس جا پٽيشنر ھئا باقي معذورن کي مھيني بعد آرڊر جاري ڪرڻ جو چئي موٽائي ڇڏيو ٻيھر جڏھن ڊي سي ٺٽو کان آرڊر جاري ڪرڻ جو مطالبو ڪيو ويو ته اتي موجود عملي ٻڌايو ته اسان وڌيڪ 40 معذورن جا آرڊر جاري ڪري ڇڏيا آھن ۽ ھاڻي اسان وٽ وڌيڪ خالي جايون ناھن ھنن جو وڌيڪ چوڻ ھو ته اسان جڏهن کانئن انھن 40 ماڻھن جي لسٽ گھري تہ ڊي سي آفيس ٺٽو جي عملي اسان کي ڌاٻا ۽ ڌڪا ڏئي آفيس مان تڙي ڪڍي ڇڏيو ، ھنن جو چوڻ ھو ته اسانکي خدشو آھي تہ سپريم ڪورٽ جي واضع حڪمن کي ٿڏيندي ڊي سي آفيس ٺٽو جي عملي سياسي ماڻھن سان ملي ڀڳت ڪري اسان معذورن جي حق تي ڌاڙو ھڻي نوڪريون چڱن ڀلن ماڻھن سان وڪيون آھن ، ھنن چيف جسٽس آف پاڪستان کان مطالبو ڪندي گھر ڪئي ته خدارا پنھنجي ڏنل فيصلي تي عمل درآمد ڪرايو ۽ 112 معذور ماڻھن کي روزگار ڏيڻ ۾ پنھنجو ڪردار ادا ڪريو ان سان گڏ ھنن ڊي سي ٺٽو کان به مطالبو ڪيو آھي تہ سندن نوڪريءَ جي راھ ۾ رڪاوٽ بڻيل سندس عملي خلاف انڪوائري ڪرائي ۽ گڏوگڏ ھتان جي چونڊيل نمائندن ۽ وزير اعلي سنڌ سيد مراد علي شاھ کان به مطالبو ڪيو آھي تہ حڪومتي مقرر معذور ڪوٽا تحت نوڪريون ڏيڻ واري عمل کي بہ صاف شفاف ۽ يقيني بڻايو وڃي.