خاتون اول آصفه ڀٽو زرداري جي پوليو خلاف جاري جنگ ۾ متحدف ٿيڻ جي اپيل

پاڪستان جي ٻارن جو مستقبل ۽ صحت اڳي کان وڌيڪ خطري ۾ آهي: آصفه ڀٽو

ڪراچي(رپورٽر)صدر آصف علي زرداري ۽ اڳوڻي وزيراعظم شهيد بينظير ڀٽو جي ڌيءَ خاتون اول ۽ ايم اين اي آصفه ڀٽو زرداري قوم کي پوليو خلاف جاري جنگ ۾ متحد ٿيڻ جي اپيل ڪئي آهي. خاتون اول آصفه ڀٽو زرداري صرف سال 2024 ۾ پوليو جا 39 تصديق ٿيل ڪيس ۽ 402 مثبت ماحولياتي نمونن تي ڳڻتي جو اظهار ڪندي چيو ته پاڪستان جي ٻارن جو مستقبل ۽ صحت اڳي کان وڌيڪ خطري ۾ آهي. هن چيو ته پوليو اسان جي ٻارن جو مستقبل 20 سالن کان وڌيڪ خطري ۾ وجهي ڇڏيو آهي. هاڻي وقت اچي ويو آهي ته متحد ٿي وڃون ۽ ان ڳالهه کي يقيني بڻايو وڃي ته هر ٻار کي باقاعدي ويڪسينيشن ذريعي تحفظ فراهم ڪيو وڃي، پوليو خلاف اسان جي جنگ ڪافي عرصي کان هلي رهي آهي پر گڏجي ڪري پوليو فري پاڪستان ٺاهي سگهون ٿا. خاتون اول آصفه ڀٽو زرداري چيو ته بلوچستان، سنڌ ۽ خيبرپختونخواهه ۾ پوليو جي ڪيسن ۾ تازو اضافو ان ڳالهه کي واضح ڪري ٿو ته فوري قدمن جي ضرورت آهي. جيتوڻيڪ سنڌ ۾ جون 2021 ۽ جون 2023 جي وچ ۾ ڪو به ڪيس رپورٽ نه ٿيو هو، پر هاڻي نوان ڪيس سامهون آيا آهن، جنهن جي ڪري حڪومت پنجن سالن کان گهٽ عمر جي ٻارن جي حفاظت لاءِ ويڪسينيشن مهم ٻيهر شروع ڪري رھي آھي. پوليو ورڪرن ۽ ليڊي هيلٿ ورڪرز جي ڪوششن کي ساراهيندي آصفه ڀٽو زرداري کين اڻ ڄاتل هيرو قرار ڏيندي چيو ته سندن هر ٻار کي زندگي بچائيندڙ ويڪسين فراهم ڪرڻ جو عزم واقعي متاثر ڪندڙ آهي. انهن جي محنت جي ڪري، اسان گهڻو ڪجهه حاصل ڪيو آهي، پر اسان جو مشن اڃا ختم نه ٿيو آهي. هن ان ڳالهه تي زور ڏنو ته رڳو ويڪسينيشن ڪافي ناهي، پاڻي، صفائي سٿرائي ۽ صحت جون بهتر سهولتون پڻ گهربل آهن. هن چيو ته سنڌ حڪومت پوليو وائرس جي منتقلي جي بنيادي سببن کي منهن ڏيڻ لاءِ انفراسٽرڪچر کي اپ گریڊ ڪرڻ، ماڊل ويڪسينيشن سينٽر قائم ڪرڻ ۽ مائرن ۽ ٻارن جي صحت جي سارسنڀال کي وڌائڻ ۾ وڏي پئماني تي سيڙپڪاري ڪئي آهي. آصفه پنهنجي والده شهيد محترمه بينظير ڀٽو کي به خراج عقيدت پيش ڪندي چيو ته شهيد بي بي جو ورثو اڄ به اسان کي متاثر ڪري ٿو. مان ۽ منهنجا ڀائر پهريان ٻار هئاسين جن کي پهرين قومي مهم دوران ويڪسين ڪئي وئي. شهيد بي بي مستقبل جي نسلن کي بچائڻ لاءِ ويڪسين جي طاقت تي يقين رکي ٿي ۽ اها اسان جي ذميواري آهي ته ان جي ويزن کي اڳتي وٺي هلون. خاتون اول آصفه ڀٽو زرداري چيو ته پوليو ويڪسين هن محفوظ، موثر ۽ روڪٿام واري مرض خلاف اسان جو مضبوط هٿيار آهي. جيتوڻيڪ پوليو جو ڪو به علاج ناهي پر ان جو خاتمو ويڪسينيشن ذريعي ڪري سگهجي ٿو، گڏجي ڪري پوليو فري پاڪستان کي حقيقت بڻائي سگهون ٿا.