ورزش سے خواتین کو مردوں کے مقابلے کتنا فائدہ ہوتا ہے؟

یہ بات امریکہ میں کی گئی ایک نئی طبی تحقیق میں سامنے آئی ہے

ورزش اچھی صحت کے لیے بہت ضروری سمجھی جاتی ہے اور مردوں کے مقابلے خواتین اس سے زیادہ فائدہ اٹھاتی ہیں۔ یہ بات امریکہ میں کی گئی ایک نئی طبی تحقیق میں سامنے آئی ہے۔ انسٹی ٹیوٹ فار ریسرچ آن ہیلی ایجنگ کی تحقیق میں بتایا گیا ہے کہ 50 فیصد کم ورزش بھی خواتین کی صحت کو مردوں کی طرح فائدہ پہنچاتی ہے۔ اس تحقیق میں 27 سے 61 سال کی عمر کے 4 لاکھ سے زائد افراد کو شامل کیا گیا اور 1997 سے 2019 تک مختلف سروے کے ذریعے ان کی صحت کے بارے میں ڈیٹا اکٹھا کیا گیا۔ اس دوران تقریباً 40 ہزار افراد لقمہ اجل بن گئے جن میں سے 11 ہزار سے زائد دل کی بیماریوں کے باعث لقمہ اجل بنے۔ تحقیق میں بتایا گیا کہ جو خواتین ہفتے میں کم از کم 150 منٹ ورزش کرتی ہیں ان میں کسی بھی وجہ سے موت کا خطرہ 24 فیصد کم ہوتا ہے۔ اس کے برعکس، جو مرد ہفتے میں کم از کم 150 منٹ ورزش کرتے ہیں، ان میں کسی بھی وجہ سے موت کا خطرہ 15 فیصد کم تھا۔ مجموعی طور پر مردوں کو ہر ہفتے کم از کم 300 منٹ کی ورزش کی ضرورت ہوتی ہے تاکہ ان کی موت کے خطرے کو خواتین کی طرح کم کیا جا سکے۔ محققین کے مطابق یہ کوئی مشاہداتی مطالعہ نہیں تھا اور نتائج کو حتمی تصور نہیں کیا جا سکتا۔ تحقیق میں یہ بھی واضح نہیں کیا گیا کہ کم ورزش کرنے کے باوجود خواتین کو زیادہ فائدہ کیوں ہوا۔ لیکن ماہرین کا کہنا ہے کہ نتائج سے ظاہر ہوتا ہے کہ اچھی صحت کے لیے جسمانی سرگرمیاں اہم ہیں۔ ماہرین کا کہنا تھا کہ ورزش کے لیے پیسے کی ضرورت نہیں، صرف وقت کی ضرورت ہے۔ محققین کے مطابق ہر قسم کی ورزش صحت کے لیے فائدہ مند ہے اور انسان مختصر وقت کے لیے بھی ورزش کر کے خود کو صحت مند رکھ سکتا ہے۔ اس تحقیق کے نتائج جرنل آف دی امریکن کالج آف کارڈیالوجی میں شائع ہوئے۔