سينيٽ مان پاس ٿيندڙ قرارداد جي ڪابه حيثيت ڪونه آهي: لياقت بلوچ

views | 08th Jan 2024 • سنڌي خبرون

سينيٽ مان پاس ٿيندڙ قرارداد جي ڪابه حيثيت ڪونه آهي: لياقت بلوچ

ڪراچي (اسٽاف رپورٽر) مرڪزي نائب امير جماعت اسلامي ۽ اڳوڻي پارلياماني ليڊر لياقت بلوچ چيو آهي ته سينيٽ مان پاس ٿيندڙ قرارداد جي ڪابه حيثيت ڪونه آهي، چونڊون نه ڪرائڻ لاءِ بار بار بهاني بازي ڪئي پئي وڃي ته جئين معاشري ۾ فڪري ڏڦيڙ ۽ طاقتورقوتون پنهنجي مرضي موجب چونڊن کي مينيج ڪري سگهن، بروقت ۽ صاف شفاف چونڊون ئي ملڪ جي معاشي ۽ سياسي بحرانن سميت سڀني مسئلن جو حل آهن.جماعت اسلامي 08 فيبروري تي فري اينڊ فيئر چونڊون چاهي ٿي ان لاءِ سرگرميون شروع ڪري ڏنيون آهن، سڀني سياسي پارٽين کي گڏجي چونڊون ملتوي ڪرائڻ وارين آئين ۽ جمهوريت دشمن سازشن کي ناڪام ڪرڻ گهرجي. سياسي پارٽين کي اقتدار تائين پهچڻ لاءِ اسٽيبلشمنٽ جو سهارو وٺڻ بدران جمهوريت ۽ عوامي طاقت کي بنياد بڻائڻ گهرجي ائين ڪير به اقتدار پليٽ ۾ رکي ڪونه ڏيندو.اهڙن خيالن جو اظهار هن جماعت اسلامي سنڌ پاران ڪوٺايل انتخابي اجلاس کي خطاب ۽ ميڊيا سان ڳالهه ٻولهه ڪندي ڪيو. صوبائي امير محمد حسين محنتي، جنرل سيڪريٽري ڪاشف سعيد شيخ،اطلاعات سيڪرٽري مجاهدچنا سميت ٻيا صوبائي اڳواڻ پڻ موجود هئا. صوبائي امير محمد حسين محنتي جي زيرصدارت انتخابي اجلاس ۾ سنڌ جي سياسي ۽ انتخابي صورتحال سميت ٻين دعوتي ۽ تنظيمي مامرن تي پڻ غور ڪيو ويو جڏهن ته سنڌ ۾ قومي ۽ صوبائي اسيمبلي جي اُميدوارن جي حتمي شڪل پڻ ڏني وئي. لياقت بلوچ جووڌيڪ چوڻ هو ته جماعت اسلامي پنهنجي منشور ۽ چونڊ نشان “ ساهمي” تي چونڊ وڙهي رهي آهي، البته سيٽ ايڊجسٽمنٽ جو آپشن کليل آهي جنهن جو جائزو وٺڻ کان پوءِ ئي فيصلو ڪيو ويندو. حڪمران جماعتن وٽ عوام وٽ وڃڻ لاءِ ڪوبه منشور ڪونه آهي، بار بار اقتدار جا مزا وٺڻ باوجود عوام کي ڪجهه به ڊليور نه ڪرڻ وارا هاڻي ماڻهن وٽ ڪهڙي منهن سان ووٽ وٺڻ وڃي رهيا آهن. جماعت اسلامي ملڪ جي واحد سياسي ۽ ديني جماعت آهي جيڪا موروثي سياست کان پاڪ آهي جنهن وٽ هر سطح جي قيادت جي چونڊ لاءِ جمهوري طريقي سان چونڊون ٿينديون آهن. لياقت بلوچ صوبائي اڳواڻن تي زور ڀريو ته هوءَ انتخابي مُهم کي تيز ۽ وڏي پئماني تي عوامي رابطي ذريعي قوم کي ٻڌائن ته هنن سڀني پارٽين کي آزمائي ڇڏيو آهي هاڻي سڀني مسئلن جو “ حل صرف جماعت اسلامي آهي”.#