عام چونڊن کي ملتوي ڪرڻ جي هر سازش خلاف جدوجهد ڪنداسين: محمد حسين محنتي

views | 11th Dec 2023 • سنڌي خبرون

عام چونڊن کي ملتوي ڪرڻ جي هر سازش خلاف جدوجهد ڪنداسين: محمد حسين محنتي

ڪراچي/رتوديرو (اسٽاف رپورٽر) جماعت اسلامي سنڌ جي امير اڳوڻو ايم اين اي محمد حسين محنتي چيو آهي ته08فيبروري تي ٿيندڙ عام چونڊن کي ملتوي ڪرڻ جي هر سازش خلاف قانوني ۽ آئيني جدوجهد ڪنداسين، مهانگائي، دهشتگردي ۽ بيروزگاري سميت سياسي توڙي معاشي بحران جو واحد حل ملڪ ۾ صاف شفاف ۽ اڻڌريون چونڊون ڪرائڻ آهي، پي ڊي ايم ۽ پي ٽي آءِ قوم کي مايوس ڪيو آهي جن ملڪ کي قرضي ۽ عوام کي بدحال ڪري ڇڏيو آهي، جماعت اسلامي متبادل قيادت ۽ عوام جي اُميدن جو آخري سهارو آهي. اهڙن خيالن جو اظهار هن رتوديرو پريس ڪلب۾ پريس ڪانفرنس کي خطاب ڪندي ڪيو. ان موقعي تي ضلعي امير قاري ابو زبير جکرو، مقامي اڳواڻ ظهوراحمد منصوري ۽ صوبائي سيڪريٽري اطلاعات مجاهد چنا پڻ موجود هئا. صوبائي امير وڌيڪ چيو ته سنڌ سميت ملڪ تيل، گيس، ڪوئلي سميت قدرتي وسيلن سان مالا مال آهي گهٽتائي فقط ديانتدار قيادت جي آهي، جماعت اسلامي ملڪ ۾ اقتدار لاءِ نه بلڪه ديانتدار قيادت ۽ اسلامي نظام لاءِ توڙي 75 سالن کان ملڪ ۾ اقامت دين ۽ اسلامي انقلاب لاءِ جدوجهد ڪري رهي آهي. نااهل، ڪرپٽ ۽ سامراج جي غلام حڪمرانن جي ڪري اڄ عوام بنيادي انساني سهولتن کان به محروم ۽ نوجوان بيروزگاري جو شڪار آهن، اهڙي ماحول ۾ عوام جي اُميدن جو مرڪز ۽ حقيقي نمائنده جماعت فقط جماعت اسلامي آهي، عوام هاڻي ڪرپٽ سياستدانن ۽ ظالم ڀوتارن بدران جماعت اسلامي جو ساٿ ڏئي. هوڏانهن محمد حسين محنتي يوسي وڏا بوسڻ ۽ ڌامراه ۽ رتوديرو ۾ به رٿيل عوامي ميڙاڪن کي خطاب ڪيو.ان موقعي تي ضلعي اڳواڻ ۽ قومي اسيمبلي جي نامزد اُميدوار ايڊوڪيٽ عاشق ڌامراه پڻ خطاب ڪيو.#