ڪوٽڏيجي مان اغوا ڄاڻايل ناري خيرپور جي عدالت ۾ پيش، جوابدارن تي اغوا ۽ زيادتي ڪرڻ جو الزام

ڪوٽڏيجي مان اغوا ڄاڻايل ناري خيرپور جي عدالت ۾ پيش، جوابدارن تي اغوا ۽ زيادتي ڪرڻ جو الزام

خيرپور(ڊ ر) ڪوٽڏيجي مان مبينا اغوا ڄاڻايل ناري خيرپور جي عدالت ۾ پيش، جوابدارن مٿان گهر ۾ گهري ڦرلٽ بعد اغوا ۽ جنسي زيادتي جا الزام، پوليس طرفان ڪابه اڳڀرائي نه ٿي، ابتو جوابدارن طرفان جاني مالي نقصان جي ڌمڪين جا الزام، تحفظ فراهم ڪرڻ ۽ جوابدارن جي گرفتاري جو مطالبو. ڪوٽڏيجي جي ڳوٺ عبدالرزاق والا مان 17 آڪٽوبر تي هٿياربندن هٿان مبينا گهر ۾ گھري ڦرلٽ بعد نائين درجي جي شاگردياڻي نوجوان ناري مسمات طيبه ڌيءَ محمد سليمان والا خيرپور جي فيملي جج مسز نور صبا جي عدالت ۾ پيش ٿي پنهنجو بيان رڪارڊ ڪرايو ھن ئ ڄاڻايو ته جوابدار ظفر علي، مير خان، اعجاز علي عرف پکي، مشتاق ۽ شهزادو بروهي جتوئي 17 آڪٽوبر تي اسان جي گهر ۾ هٿيارن جي زور تي داخل ٿي گهر ڀاتين کي يرغمال بڻائي گھر ۾ رکيل 8 تولا سونا زيور ۽ ڏيڍ لک رپيا روڪ ۽ هڪ رائفل ڦرڻ بعد مون کي زبردستي وارن مان گهلي هڪ ڪار ۾ اغوا ڪري نامعلوم هنڌ رکيائون ۽ نشو ڏيندا رهيا ۽ نشي جي حالت ۾ مختلف جاين تي رهائيندا هيا ۽ وحشي جوابدارن مختلف وقتن مون سان زناهه پڻ ڪندا رهيا، هن عدالت کان مطالبو ڪيو ته جوابدارن خلاف قانوني ڪاروائي ڪري کين عبرتناڪ سزا ڏياري وڃي. ھوڏانھن جوابدارن خلاف ڪوٽڏيجي ٿاڻي تي ڪيس داخل هئڻ باوجود پوليس طرفان جوابدارن کي گرفتار نه ڪرڻ ۽ ڪيس تان ڌمڪيون ڏيڻ واري عمل خلاف ناري طيبه پنهنجي وارثن محمد سليمان والا، رستم والا ۽ ٻين سان گڏجي خيرپور ۾ احتجاج ڪيو ھن ٻڌايو ته ته جوابدارن خلاف ڪيس داخل آهي پر پوليس جوابدارن کي گرفتار نٿي ڪري جڏهن ته ڪيس تان هٿ کڻڻ لاءِ جوابدار توڙي علائقي جا بااثر بروهي جتوئي برادري جي ناروز خان، علي گل، حسن علي، نصرالله ۽ ٻيا ڌمڪيون ڏيئي رهيا آهن. انڪار ڪرڻ تي اسان کي ڪوڙن ڪيسن ۾ ڦاسائڻ ۽ جاني مالي نقصان پهچائڻ جون ڌمڪيون ڏيئي رهيا آهن. هنن آءِ جي سنڌ، ڊي آءِ جي سکر، ايس ايس پي خيرپور، ڊي ايس پي ڪوٽڏيجي ۽ ٻين وس وارن کان مطالبو ڪيو ته جوابدارن کي گرفتار ڪري اسان کي تحفظ فراهم ڪيو وڃي.