سجاول ۾ ڪشمير ڊي جي حوالي سان ڪارو ڏينھن ملھايو ويو، ريلي ۽ تقريب منعقد

ضلعي انتظاميھ پاران ڊي سي عبدالواجد شيخ جي قيادت ۾ بوائز هاءِ اسڪول کان ڊگري ڪاليج تائين ريلي ڪڍي وئي

سجاول (گلشيرميربحر) ڊپٽي ڪمشنر سجاول جي اڳواڻي ۾ ڪشميرين سان يڪجهتي جي اظهار ۾ ”ڪارو ڏينهن“ ملھائڻ بابت ريلي ۽ تقريب جو اھتمام ڪيو ويو, ڪشميرين سان يڪجهتي جي اظهار لاءِ ”ڪارو ڏينهن“ ملهائڻ جي سلسلي ۾ ضلعي انتظاميہ سجاول پاران ڊپٽي ڪمشنر عبدالواجد شيخ جي قيادت ۾ گورنمينٽ بوائز هاءِ اسڪول کان گورنمينٽ بوائز ڊگري ڪاليج سجاول تائين هڪ شاندار ريلي ڪڍي وئي. ان موقعي تي مظاهرين هٿن ۾ پلي ڪارڊ، بينر ۽ ڪشميري جهنڊا کڻي ڀارتي فوج جي غنڊه گردي جي خلاف ۽ ڪشميري حُريت پسندن جي حق ۾ سخت نعريبازي پڻ ڪئي. بعد ۾ گورنمينٽ بوائز ڊگري ڪاليج ۾ ھڪ شاندار تقريب منعقد ڪئي وئي. ان موقعي تي ڳالهائيندي ڊپٽي ڪمشنر عبدالواجد شيخ چيو ته 27ـ آڪٽوبر 1947ع تي ڀارتي فوج جنت نظير وادي ڪشمير تي قبضو ڪري والاريل ڪشمير جي مسلمانن تي ڀارت پاران ظلم، بربريت ۽ رياستي دهشتگردي جو بدترين سلسلو شروع ڪيو ويو جيڪو اڄ به جاري آهي. هن چيو ته والاريل ڪشمير ۾ ڪافي عرصي کان ڪرفيو جاري آهي جنهن سبب ڪشميري عوام جي زندگي مفلوج ٿي وئي آهي. هن چيو ته ڪشميرين جي حق خوداراديت لاءِ سمورا پاڪستاني ڪشميرين سان گڏ بيٺا آهن. هن ڀارتي فورسز طرفان ڪشميري عوام تي ظلم ۽ غير انساني سلوڪ جي سخت مذمت ڪندي چيو ته عالمي ادارا والاريل ڪشمير ۾ انساني حقن جي ڀڃڪڙين جو فوري نوٽيس وٺن. تقريب کي ڊسٽرڪٽ ايجوڪيشن آفيسر پرائمري پيار علي خواجه، پرنسپال گورنمينٽ بوائز ڊگري ڪاليج پروفيسر محمد حسن ڀٽي ۽ ٻين پڻ خطاب ڪيو. ان کان اڳ شاگردن ڪشميرين سان يڪجهتي جي اظهار ۾ تقريرون ۽ ٽيبلوز پڻ پيش ڪيا. ان موقعي تي ايڊيشنل ڊپٽي ڪمشنر ون عبدالڪريم سنگراسي، اسسٽنٽ ڪمشنر سجاول رضوان عالم شيخ، تعليم، صحت، پوليس، روينيو، لوڪل گورنمينٽ ۽ ٻين کاتن جي آفيسرن ۽ عملي کان علاوه مختلف اين جي اوز جي نمائندن، ميڊيا ۽ سول سوسائٽي وڏي انگ ۾ شرڪت ڪئي.