سجاول ۾ ڊپٽي ڪمشنر و چيئرمين ضلعي انفورسمينٽ ڪميٽي جي صدارت هيٺ اجلاس

اجلاس ۾ ضلعي اندر بجلي چوري جي روڪٿام ۽ بقاياجات جي وصولي لاءِ بهتر حڪمت عملي جوڙڻ بابت غور ويچار

سجاول(رپورٽر) ڊپٽي ڪمشنر و چيئرمين ضلعي انفورسمينٽ ڪميٽي سجاول عبدالواجد شيخ جي صدارت هيٺ ضلعي اندر بجلي چوري جي روڪٿام ۽ بقاياجات جي وصولي لاءِ بهتر حڪمت عملي جوڙڻ جي حوالي سان اجلاس منعقد ٿيو، جنهن ۾ ايس ايس پي شهلا قريشي، ايڪسين حيسڪو فريدالدين، ضلعي جي سمورن اسسٽنٽ ڪمشنرن ۽ مختيارڪارن شرڪت ڪئي. اجلاس ۾ فيصلو ڪيو ويو ته حيسڪو اختيارين موجب بجلي چوري جي روڪٿام ۽ بقايا جي وصولي واري مهم کي جاري رکيو ويندو. ان موقعي تي ڊپٽي ڪمشنر چيو ته هي هڪ قومي مهم آهي ان ۾ ڪوتاهي برداشت نه ڪئي ويندي ڇو ته بجلي چوري جهڙي سنگين ڏوهه ازالو بل ادا ڪندڙ عوام کي برداشت ڪرڻو پوي ٿو. هن حيسڪو آفيسرن کي هدايت ڪئي ته هو بجلي چوري کي روڪڻ ۽ ڪنڊا ڪلچر جي خاتمي لاءِ موثر حڪمت عملي جوڙي غيرقانوني ڪنيڪشن ختم ڪيا وڃن ۽ ان سلسلي ۾ سرڪاري ڪم ۾ مداخلت ڪندڙن خلاف سخت ڪارروائي ڪئي وڃي ته جيئن ضلعي مان بجلي چوري جو مڪمل خاتمو ڪري لوڊشيڊنگ ۾ گهٽتائي آڻي سگهجي. هن چيو ته ان ڏس ۾ ضلعي انتظاميه هر ممڪن تعاون ڪندي. هُن ضلعي جي عوام کي خبردار ڪيو آھي ته هو ڪنڊا ڪلچر ۽ بجلي چوري کان پاسو ڪن ۽ ھڪ ذميوار شهري هجڻ جي حيثيت ۾ قانوني طريقي سان بجلي جو استعمال ڪن ته جيئن بجلي چوري جو خاتمو آڻي ملڪ ۽ قوم کي خوشحالي ۽ ترقي جي راهه تي گامزن ڪري سگهجي. ان موقعي تي ايس ايس پي شهلا قريشي چيو ته ضلعي پوليس بجلي چوري جهڙي ناسور تي ضابطو آڻڻ لاءِ ضلعي انتظاميا ۽ واپڊا اٿارٽي سان مڪمل تعاون ڪندي. ايڪسين حيسڪو فريد الدين ٻڌايو ته ضلعي ۾ هن وقت تائين ضلعي ۾ بجلي چورن خلاف 7 ايف آءِ آر داخل ڪيون ويون آهن جڏهن ته بجلي چوري کي روڪڻ ۽ ڪنڊا ڪلچر جي نشاندهي ڪري مهم کي وڌيڪ تيز ڪيو ويو آھي. هن ٻڌايو ته ضلعي ۾ بجلي جا بل ادا نه ڪندڙن کان هن وقت تائين اٽڪل 70 لک روپين جي وصولي ڪئي وئي آهي.