ڪشمور ۾ مغوين جي بازيابي لاءِ لڳل ڌرڻي جي حمايت ۾ شڪارپور واسي به روڊن تي نڪري آيا

ڪشمور/ڪنڌڪوٽ,شڪارپور ۽ گھوٽڪي ضلعن ۾ انڌيرنگري ۽ ڌاڙيل راڄ قائم آهي: اڳواڻ

شڪارپور(احسان ابڙو) ڪشمور واسين پاران مغوين جي بازيابي لاء لڳايل ڌرڻي جي حمايت ۽ ساڻن يڪجھتي طور شڪارپور واسي به روڊن تي نڪري آيا,ان سلسلي ۾ قلم ڌڻين,سول سوسائٽي جي ماڻهن,قومپرستن ۽ شھرين پاران جھاز چوڪ کان پريس ڪلب تائين احتجاجي ريلي ڪڍي ڌاڙيل گردي,پوليس نااھلي ۽ وڏيرا شاھي خلاف نعري بازي ڪئي وئي,ان موقعي تي اڳواڻن ھمير چانڊيو,جاويد راھوجو,اسلام الدين لھر,عمران منگي,غلام علي ميمڻ,ڪامريڊ اسد سومرو,پرويز ابڙو,احسان جيھو,بشير شر,وارث ابڙو ۽ ٻين چيو تہ سنڌ ۾ بدامني عروج تي پھچي وئي آھي ۽ خاص ڪري ڪشمور/ڪنڌڪوٽ,شڪارپور ۽ گھوٽڪي ضلعن ۾ انڌيرنگري لڳي پئي آھي,ھنن چيو تہ اسان ڪشمور جي عوام کي سلام پيش ڪيون ٿا جن وڏيرا شاھي ۽ ڌاڙيل راڄ خلاف ھڪ پيج تي اچي مسلسل ٽن ڏينھن کان مغوين جي بازيابي لاء ڌرڻو ھڻي ويھي رھيا آھن تنهن ڪري ايئن ئي جيڪڏهن اسان جا ماڻھو پنھنجي حقن لاء روڊن تي نڪري آيا تہ ھڪ ڏينھن ضرور امن ٿيندو,ھنن نگران حڪومت کان گھر ڪئي تہ جيڪڏھن بدامني تي ڪنٽرول نہ ٿيو ۽ اغوا ٿيل ماڻھو بازياب نہ ٿيا تہ سڄي سنڌ اندر احتجاجي مظاھرا شروع ڪيا ويندا جيڪي تيسيتائين جاري رھندا جيسيتائين امن امان جي صورتحال بھتر نہ ٿيندي.