نوشهروفيروز جي نجي ميڊيڪل سينٽر ۾ مبينا غلط آپريشن سبب عورت مرڻينگ

15ڏينهن اڳ مسمات مجيدان کي ويم لاء نجي ميڊيڪل سينٽر کڻائي آياسين: وارث

نوشھروفيروز (ڊ ر) نجي ميڊيڪل سيٽر جو مالڪ ڊاڪٽر ابراهيم ميمڻ ويم لاء اسپتال آيل عورت مبينا غلط آپريشن ڪري مرڻينگ ٿي وئي۔ نوابشاه اسپتال ريفر ٿيل مريض کي ڊاڪٽرن علاج ڪرڻ کان جواب ڏئي ڇڏيو۔ وارث مريض کڻائي پريس ڪلب نوشھروفيروز پهچي ويا۔ غلط آپريشن ڪندڙ ڊاڪٽر تي ڪيس داخل ڪري گرفتار ڪرڻ جو مطالبو۔ ڳوٺ مٺاخان مري جي رهواسي ربنواز مري صحافين سان ڳالهائيندي چيو ته 15 ڏينهن اڳ مان پنهنجي ڀاڄائي مجيدان کي ويم لاء رابعه سينٽر کڻائي آياسين جتي ڊاڪٽر ابراهيم ميمڻ عورت جو غلط آپريشن ڪري مرڻينگ ڪري ڇڏيو جڏهن ته 10 ڏينهن تائين اسان کي خرچ ڪرائيندو رهيو ليڪن مريض جي طبيعت سڌرڻ بجاء خراب ٿيندي وئي۔ 10 ڏينهن کان پوء ڊاڪٽر ابراهيم چيو ته توهان جي مريض گڙدن جي تڪليف ۽ بلڊ ڪينسر آھي نوابشاه کڻائي وڃو پر نوابشاه جي ڊاڪٽرن به اسان کي جواب ڏئي ڇڏيو آھي۔ هنن چيو ته اسان بلڪل ٺيڪ مريض کي ڊليوري لاء وٺي آيا هئاسين پر هن وقت زنده لاش ڳوٺ کڻائي وڃي رهيا آھيون۔ ڳوٺاڻن هيلٿ ڪيئر ڪميشن سميت اعلي اختيارين کان مطالبو ڪيو ته انسانيت جي قاتل ڊاڪٽر ابراهيم ميمڻ تي ڪيس داخل ڪري کين گرفتار ڪيو وڃي رابعه سينٽر کي تالو لڳائي اسان کي انصاف ڏياريو وڃي۔