ڊي سي نوشھروفيروز جي صدارت ھيٺ ممتا پروگرام بابت اجلاس

نوشهروفيروز (ڊ ر)سنڌ سوشل پروٽيڪشن اٿارٽي تحت ممتا پروگرام کي بهتر بڻائڻ لاءِ قائم ڪيل ضلعي ڪوآرڊينيشن ڪميٽي جو اجلاس ڊپٽي ڪمشنر نوشهروفيروز محمد ارسلان سليم جي صدارت ۾ منعقد ٿيو. اجلاس ۾ ضلعي سوشل پروٽيڪشن ڪوآرڊينيٽر نوشهروفيروز ميڊم ڪلثوم جويو، ضلعي مئنيجر پي پي ايڇ آءِ هدايت الله ميمڻ، ايڊيشنل ڊائريڪٽر لوڪل گورنمينٽ عبدالجبار ٽڳڙ، اسسٽنٽ ڊائريڪٽر نادرا عابد حسين، ايڊيشنل ڊي ايڇ او ڊاڪٽر حاڪم علي جوکيو، ڊاڪٽر مختيار علي ميمڻ، ممتا پروگرام جي فيلڊ آفيسر محمد اقبال ملڪ ۽ ٻيا لاڳاپيل آفيسر شرڪت ڪئي. اجلاس کي خطاب ڪندي ڊپٽي ڪمشنر چيو ته سنڌ حڪومت جو هي ممتا پروگرام ضلعي جي عورتن ۽ ٻارن جي زندگي جي معيار ۽ طبي سهولتن جي فراهمي کي بهتر بڻائيندو. هن هن پروگرام کي تيز ۽ اثرائتو بڻائڻ جي اهميت تي زور ڏنو. هن چيو ته سڀني صحت مرڪزن ۾ ايندڙ عورتن کي بهترين سهولتن جي فراهمي کي يقيني بڻايو وڃي. هن چيو ته ڪميٽي جي سڀني ميمبرن کي هن حوالي سان شعور پيدا ڪرڻ ۾ پنهنجو ڀرپور ڪردار ادا ڪرڻ گهرجي. هن لوڪل گورنمينٽ ڊپارٽمينٽ جي آفيسرن کي هدايت ڪئي ته اهي پنهنجي سڀني يوسي سطح جي آفيسن ۾ هن حوالي سان شعور پيدا ڪن. هن نادرا جي آفيسرن کي هدايت ڪئي ته اهي پنهنجن آفيسن ۾ ايندڙ شهرين کي ان بابت آگاهي ڏيڻ لاءِ بينر لڳائين ۽ عوامي هنڌن تي آگاهي بينر پڻ لڳائين. ڊپٽي ڪمشنر چيو ته هن مهم بابت سڀني تعلقن جي چونڊيل نمائندن ۽ اسسٽنٽ ڪمشنرن سان رابطو ڪيو وڃي ته جيئن اهي هن مهم بابت شعور پيدا ڪرڻ ۾ پنهنجو ڪردار ادا ڪري سگهن. اجلاس کي بريفنگ ڏيندي ضلعي سربراهه مامتا پروگرام ڪلثوم جويو چيو ته ضلعي جي 47 اسپتالن ۾ حامله عورتن ۽ ٻن سالن کان گهٽ عمر وارن ٻارن جي رجسٽريشن ڪئي پئي وڃي. هن عمل ۾ پي پي ايڇ آءِ جي انتظام هيٺ اسپتالن ۾ خاص ڪائونٽر قائم ڪيا ويا آهن جتي عورتن جي رجسٽريشن ڪئي پئي وڃي. هن وڌيڪ چيو ته اسپتال ۾ ايندڙ عورتن کي ٻار جي پيدائش دوران پيش ايندڙ مسئلن کي گهٽائڻ لاءِ في خاندان 41,000 رپيا امداد ڏني ويندي. ان لاءِ شرط آهي ته اهي عورتون ڪراچي ۽ حيدرآباد کانسواءِ سڄي سنڌ جي ضلعن جون رهواسي هجن. عورتن کي پنهنجو سڃاڻپ ڪارڊ ضرور آڻڻ گهرجي ۽ ٻار جي صورت ۾ ٻار جو بي فارم لازمي آهي. عورتن کي مختلف مرحلن تي 16 ڀيرا اسپتال اچڻو پوندو. هن چيو ته اهو گذريل ٽن مهينن ۾ شروع ٿيو آهي ۽ هاڻي تائين نوشهروفيروز ضلعي جي 16,185 عورتن کي رجسٽرڊ ڪيو ويو آهي، جن کي امدادي رقم فراهم ڪرڻ جو عمل تمام جلد شروع ڪيو ويندو.