ملير: سڪڻ ٿاڻي جي پوليس خلاف پورهيت عورت جا سنگين الزام

ملير (رپورٽ: عبدالرشيد مورجھريو) سڪڻ ٿاڻي جي حد ريڙهي ڳوٺ جي قاسماڻي پاڙي جي رهواسي پورهيت عورت حميده عوامي پريس ڪلب ۾ پريس ڪانفرنس ڪندي سڪڻ ٿاڻي جي ڪجهه پوليس اهلڪارن تي سنگين الزام مڙهيا آهن پريس ڪانفرنس دوران حميده چيو ته پوليس اهلڪار روزاني بنياد تي بنا جواز سندس گهر ۾ داخل ٿين ٿا هن الزام هنيو ته ڪجهه اهلڪار مبينا طور شراب يا نشي جي حالت ۾ گهر تي چڙهائي ڪندا آهن ۽ سندس معصوم ٻارڙن سان بدتميزي ڪرڻ سان گڏ لٺين سان تشدد به ڪندا آهن هن وڌيڪ چيو ته پوليس اهلڪار چون ٿا ته هو رفيق ڀيان جي ڳولا ۾ آيا آهن جڏهن ته هو کين بار بار ٻڌائي چڪي آهي ته سندس گهر واري جو نالو رفيق هنا آهي سندس چوڻ موجب پوليس اهلڪار نه صرف گهر ڀاتين سان ناروا سلوڪ ڪن ٿا پر گهر مان پئسا ۽ ميڪ اپ جو سامان به کڻي ويا آهن. هن اهو به دعويٰ ڪيو ته ڪجهه اهلڪار وردي ۾ جڏهن ته ڪجهه سادي ويس ۾ گهر ۾ داخل ٿين ٿا حميده انتظاميا کان سوال ڪندي چيو ته گهرن جون الماريون ٽوڙڻ ۽ سامان جي مبينا چوري پوليس جي ذميوارين ۾ شامل ناهي. هن آءِ جي سنڌ ۽ ٻين اعليٰ پوليس اختيارين کان مطالبو ڪيو ته سڪڻ ٿاڻي جي اهلڪارن خلاف لڳايل الزامن جو نوٽيس وٺي شفاف جاچ ڪرائي وڃي، کيس ۽ سندس ٻارڙن کي تحفظ فراهم ڪيو وڃي ۽ جيڪڏهن الزام ثابت ٿين ته ملوث اهلڪارن خلاف قانون موجب ڪارروائي ڪئي وڃي