ٺٽي ويجھو پوليس اٽالن جي ڳوٺ تي چڙھائي، سمورا گھر ڊاھي پٽ، متاثرن جو 3 ڪلوميٽر مارچ

متاثرن پاران سياسي سماجي ڌرين عورتن توڙي ٻارڙن سميت 3 ڪلوميٽر پيادل مارچ ڪري ٺٽي ۾ ڌرڻو ھنيو ويو

ٺٽو(محمد شفيق ڀٽي) ٺٽي لڳ ڳوٺ عارب سولنگي تي صبح سويل ٿيل پوليس گردي خلاف متاثر ڳوٺاڻا عورتن ۽ ٻارڙن سميت روڊن تي نڪري آيا، ڳوٺ عارب سولنگي کان پريس ڪلب ٺٽي تائين سخت گرمي ۾ 3 ڪلو ميٽر پيادل مارچ شروع ڪري پوليس گردي خلاف سخت نعريبازي ڪري پريس ڪلب ٺٽي اڳيان ڌرڻو ھڻي ويھي رھيا، جنھن احتجاجي مارچ جي اڳواڻي جيئي سنڌ محاذ جو وائيس چيئرمين نواز شاھ ڀاڏائي، ايس ٽي پي ضلعي صدر سيد جلال شاھ، عوامي تحريڪ جي ضلعي صدر عبدالرزاق چانڊيو، جيئي سنڌ تحريڪ جي مرڪزي جنرل سيڪريٽري راول ڪرناڻي، سينيئر وڪيل اشرف سمون، پريس ڪلب ٺٽو صدر اقبال جاکرو، سينيئر صحافين حاجن سولنگي، محبوب بروھي، قومي عوامي تحريڪ مرڪزي اڳواڻ ياسر جاکرو، سماجي اڳواڻ محمد حسن سمون، مير علي سولنگي، محمد خان ملاح، محمد حسن سولنگي ۽ ٻيا ڪري رھيا ھئا. احتجاجي ڌرڻي کي جسم اڳواڻ نواز شاھ ڀاڏائي، سيد جلال شاھ، اقبال جاکرو، محبوب بروھي، وڪيل اڳواڻن اشرف سمون، پنھون عقيلي، سولنگي برادري جي سردار زبير سولنگي، سماجي اڳواڻ جاويد سمون، پ پ اڳواڻ حاجي گل محمد سمون، محمد حسن سولنگي ۽ ٻين خطاب ڪندي چيو تہ ٺٽو پوليس عدالتي حڪم جو غلط استعمال ڪندي ڳوٺ عارب سولنگي جي ڳوٺاڻن سان بربريت قائم ڪئي آھي، پوليس جي اھڙي ڪاروائي جي نہ رڳو مذمت ڪريون ٿا پر ڀرپور احتجاجي تحريڪ ھلائڻ سان گڏ عدالت ۾ پڻ پٽيشن داخل ڪرائي ويندي. ھنن چيو تہ ڳوٺ عارب سولنگي جا رھواسي ھڪ صدي کان ڳوٺ آباد ڪري رھي رھيا آھن، جن کي پنھنجو حق ملڻ گھرجي پر ٺٽو پوليس ونگارو بڻجي سڄو ڳوٺ ئي ڊاھي مسمار ڪري ڇڏيو آھي. ھنن چيو تہ متاثر ڳوٺاڻن کي ڪنھن بہ صورت ۾ اڪيلو نہ ڇڏيو ويندو، سندن ھر ممڪن مدد ڪئي. ويندي، سنڌ ھاءِ ڪورٽ ۾ پڻ پوليس جي ڪاروائي خلاف ڪيس داخل ڪرايو ويندو. ھنن گھر ڪئي تہ ڳوٺ عارب سولنگي ۾ ٿيل پوليس گردي جو نوٽيس وٺي ڳوٺاڻن سان ٿيل ناانصافين توڙي نقصان جو ازالو ڪرائي کين بيدخل ٿيڻ پان بچايو وڃي. ان موقعي تي متاثر ڪيترن ئي عورتن دانھيندي چيو تہ پوليس ساڻن وڏي زيادتي ڪري سندن سڀ ڪجھ زبردستي کڻي ويئي اھي، جنھن ڪري ھاڻي وٽن کائڻ توڙي پائڻ لاء بہ ڪجھ ناھي رھيو، ھنن پڻ وس وارن کان انصاف جو مطالبو ڪندي تحفظ مھيا ڪرڻ جي گھر ڪئي آھي.