عمرڪوٽ ۾ ڊي سي نويد الرحمان لاڙڪ جي صدارت ھيٺ اجلاس ٿي گذريو

اجلاس ۾ چيئرمين ضلعي ڪائونسل حاجي محمد بقاء پلي، ايس ايس پي سھائي عزيز ٽالپر ۽ ٻيا شريڪ

عمرڪوٽ (رپورٽ:ڪانجي مل رکيسر) عمرڪوٽ ضلعي کي پوليو کان مڪمل طور تي پاڪ ڪرڻ لاءِ پرعزم آهيون ان لاءِ ضلعي سمورا وسيلا ڪتب آڻينداسين، ڊپٽي ڪمشنر عمرڪوٽ نويد الرحمان لاڙڪ. خبر موجب ڊپٽي ڪمشنر عمرڪوٽ نويد الرحمان لاڙڪ جي صدارت ھيٺ SNID مئي 2026ع مهم جي حوالي سان “ڊسٽرڪٽ ريڊينس ميٽنگ" ڊپٽي ڪمشنر آفيس جي درٻار حال ۾ ڪوٺائي وئي، ان موقعي تي اجلاس ۾ چيئرمين ضلع ڪائونسل عمرڪوٽ حاجي محمد بقاء پلي، ايس ايس پي عمرڪوٽ سھائي عزيز ٽالپر، ايڊيشنل ڊپٽي ڪمشنر ون جاويد احمد ڏاھري، ايڊيشنل ڊپٽي ڪمشنر ٽو عمران خان، ڊسٽرڪٽ ھيلٿ آفيسر ڊاڪٽر محمد علي نھڙي، اسسٽنٽ ڪمشنر عمرڪوٽ رجب علي سٺيو، اسسٽنٽ ڪمشنر سامارو سنجئہ ڪمار ترڪيو، اسسٽنٽ ڪمشنر ڪنري محمد خان ڀنگوار، اسسٽنٽ ڪمشنر پٿورو غلام علي طارق، ايڊيشنل ڊسٽرڪٽ ھيلٿ آفيسر ڊاڪٽر فريد احمد ھنڱورجو، ڊاڪٽر لڇمڻ داس ڪيسراڻي، پوليو فوڪل پرسن ڊاڪٽر وجئہ ڪمار، ڊسٽرڪٽ انفارميشن آفيسر عمرڪوٽ محمد اسلم ڀٽي، تعليم کاتي، ميونسپل ڪميٽي عمرڪوٽ، ڊپٽي ڊائريڪٽر پرائيويٽ اسڪول سيد خان محمد شاھ ۽ صحت کاتي سميت لاڳاپيل عملدارن WHO، روٽري انٽرنيشنل، سماجي تنظيمن ۽ ٻين لاڳاپيل ادارن جا عملدارن شرڪت ڪئي. ان موقعي تي اجلاس کي خطاب ڪندي ڊپٽي ڪمشنر نويد الرحمان لاڙڪ چيو تہ تہ والدين پنھنجي پنجن سالن کان گھٽ عمر جي ٻارن کي پوليو کان بچاءُ جا ڦڙا ضرور پيارين، جيئن مستقبل جي نسل کي معذوري کان محفوظ بڻائي سگهجي، ھن چيو تہ پوليو جو خاتمو وقت جي ضرورت آهي جنهن لاءِ تمام تر وسيلا استعمال ڪيا وڃن يوسي ايم اوز ۽ ايريا انچارج جو پوليو مهم ۾ اھم ڪردار آھي، جڏهن تہ پوليو مهم جي تيارين، سيڪيورٽي انتظامن، ٽيم ورڪ، والدين ۾ شعور اجاگر ڪرڻ ۽ ٻارن کي پوليو کان بچاءُ جا ڦڙا پيارڻ بابت تفصيلي جائزو پڻ ورتو ويندو. ان موقعي تي اجلاس ۾ ايس ايس پي عمرڪوٽ سھائي عزيز ٽالپر چيو تہ پوليو قومي ڪاز آھي جنھن لاء ڀرپور تعاون ڪيو ويندو ۽ جتي اضافي سيڪيورٽي جي ضرورت ھوندي ان کي وڌيڪ سيڪيورٽي اھلڪار مقرر ڪيا ويندا. ان موقعي تي اجلاس ۾ پوليو فوڪل پرسن ڊاڪٽر وجئہ ڪمار چيو تہ 18 مئي کان 21 مئي تائين گھر گھر وڃي پوليو کان بچاءُ جا ڦڙا پياريا ويندا جڏهن تہ پوليو مهم بابت سمورا انتظام مڪمل ڪيا ويا آهن ھن پوليو مهم ۾ ٽوٽل ٽارگيٽ 91656 آھي. اجلاس کانپوءِ ڊپٽي ڪمشنر نويد الرحمان لاڙڪ، ايس ايس پي عمرڪوٽ ، ڊسٽرڪٽ ھيلٿ آفيسر عمرڪوٽ سميت صحت کاتي جي ڊاڪٽرن سان گڏجي ڊسٽرڪٽ ھيڊ ڪوارٽر اسپتال عمرڪوٽ ۾ ٻارڙن کي پوليو کان بچاءُ جا ڦڙا پياري پوليو مهم جو افتتاح ڪيو ويو ۽ آگاھي واڪ پڻ منعقد ڪئي ريلي ڪڍي وئي، جنھن جو مقصد عوام ۾ پوليو کان بچاءُ بابت شعور اجاگر ڪرڻ آھي۔