ڊپٽي ڪمشنر ٺٽو سرمد علي ڀاڳت جي صدارت هيٺ اجلاس

درٻار هال مڪلي ۾ ري رائيٽنگ جي جاري ڪم بابت اجلاس ٿيو

ٺٽو( محمد شفيق ڀٽي)ڊپٽي ڪمشنر ٺٽو سرمد علي ڀاڳت جي صدارت هيٺ درٻار هال مڪلي ۾ ري رائيٽنگ جي جاري ڪم بابت هڪ اهم اجلاس منعقد ٿيو، جنهن ۾ ضلعي جي سمورن اسسٽنٽ ڪمشنرن، مختيارڪارن، اسسٽنٽ مختيارڪارن، سپروائزنگ تپيدارن ۽ تپيدارن شرڪت ڪئي۔ اجلاس دوران ڊپٽي ڪمشنر کي ضلعي ۾ جاري ري رائيٽنگ جي ڪم جي اڳڀرائي بابت تفصيلي بريفنگ ڏني وئي۔ ان موقعي تي ڊپٽي ڪمشنر سرمد علي ڀاڳت سمورن روينيو آفيسرن ۽ لاڳاپيل عملي کي سختي سان هدايت ڪئي ته ري رائيٽنگ جي جاري ڪم کي هر صورت هڪ هفتي اندر مڪمل ڪيو وڃي، جيئن عوام کي وڌ کان وڌ سهولتون ۽ رليف فراهم ڪري سگهجي۔ هن واضح ڪيو ته ان سلسلي ۾ ڪنهن به قسم جي غفلت يا دير هرگز برداشت نه ڪئي ويندي، ۽ فرضن ۾ ڪوتاهي ڪندڙ آفيسرن خلاف سخت ڪارروائي ڪئي ويندي۔ ڊپٽي ڪمشنر چيو ته عوام کي بروقت ۽ بهتر سهولتون فراهم ڪرڻ ضلعي انتظاميا جي اولين ترجيحن ۾ شامل آهي، ۽ روينيو معاملن ۾ شفافيت ۽ تيزي آڻڻ لاءِ سمورا موجود وسيلا ڪتب آندا پيا وڃن۔ هن لاڳاپيل آفيسرن کي هدايت ڪئي ته هو ڪم جي معيار ۽ رفتار کي يقيني بڻائيندي مقرر مدت اندر هر صورت ۾ هدف مڪمل ڪن۔