باڊهه ٿاڻي جي حد ۾ هٿياربند ڳوٺ منڌرا واسي کان 7 لک رپيا ڦر ڪري فرار ٿي ويا

ڏوڪري(رپورٽر) ڏوڪري باڊھ ٿاڻي جي حد ۾ ڏوهارين جو راڄ، باڊھ ٿاڻي جي حد خير واھ وٽان هٿياربند ڦورن ڳوٺ منڌرا جي رهواسي بشير احمد جوڻيجو کان ست لک رپيا ڦر ڪري فرار ٿي ويا. تفصيل موجب خير واھ ڀرسان ون ٽو فائيو موٽرسائيڪل تي سوار ٽي هٿياربند جوابدارن بشير احمد جوڻيجو کي روڪي هٿيارن جي زور تي وٽس موجود ست لک رپيا ڦر ڪري فرار ٿي ويا واقعي کانپوءِ علائقي ۾ خوف ۽ هراس پکڙجي ويو. متاثر ڳوٺاڻي بشير احمد جوڻيجو ميڊيا سان ڳالهائيندي چيو ته باڊھ پوليس ڏوهارين آڏو بيوس بڻيل رهي آهي، باڊھ ڏوڪري روڊ سميت ڀرپاسي وارن علائقن ۾ ڦريون ۽ چوريون روز جو معمول بڻجي ويون آهن، جنهن سبب علائقي جا رهواسي سخت پريشاني ۾ مبتلا ٿي ويا آهن. هن وڌيڪ چيو ته پوليس ڏوهارين خلاف مؤثر ڪارروائي ڪرڻ ۾ ناڪام ٿي وئي آهي، جڏهن ته علائقي ۾ امن امان جي صورتحال ڏينهون ڏينهن خراب ٿيندي پئي وڃي. متاثر شخص ايس ايس پي لاڙڪاڻو ۽ ڊي آءِ جي لاڙڪاڻو کان فوري نوٽيس وٺي جوابدارن جي گرفتاري ۽ ساڻس انصاف ڪرڻ جو مطالبو ڪيو آهي.