عمرڪوٽ ۾ سافڪو تحت هلندڙ غير رسمي تعليم مرڪزن جو اوچتو معائنو

عمرڪوٽ (رپورٽ:ڪانجي مل رکيسر) ضلعي عمرڪوٽ جي مختلف علائقن ۾ SAFCO سپورٽ فائونڊيشن جي تحت هلندڙ ٽن غير رسمي تعليم (NFE) مرڪزن جو اوچتو مانيٽرنگ دورو ڊائريڪٽوريٽ آف لٽريسي اينڊ نان فارمل ايجوڪيشن (DLNFE)، حڪومت سنڌ جي عملدارن طرفان ڪيو ويو، دوري ۾ ايڊيشنل ڊائريڪٽر DLNFE مسٽر عبدالله جنوري ۽ اسسٽنٽ ڊائريڪٽر عمران سومرو شرڪت ڪئي، جڏهن ته ساڻن گڏ پروجيڪٽ ڪوآرڊينيٽر، مئنيجر مانيٽرنگ اينڊ ايويوليئيشن ۽ ضلعي ڪوآرڊينيٽر عمرڪوٽ پڻ موجود هئا، عملدارن مرڪزن جو تفصيلي جائزو ورتو، جتي شاگردن جي حاضري تسلي بخش ڏٺي وئي، استادن پڻ ٽريننگ آف فيسيلٽيٽرز (ToF) جي هدايتن مطابق تدريسي سرگرمين ۾ ڀرپور شرڪت ڪندي ٻارن سان مؤثر رابطي جو مظاهرو ڪيو، ان موقعي تي وفد ڳوٺن جي سينٽر مئنيجمينٽ ڪميٽي (CMC) سان پڻ ملاقات ڪئي، جنهن ۾ والدين ۽ مقامي ماڻهن شرڪت ڪئي، ملاقات دوران ڳوٺ ۾ امڪاني سکيا وٺندڙن بابت تفصيلي ڳالهه ٻولهه ڪئي وئي ۽ NFE مرڪزن جي ڪارڪردگي ۽ مستقبل جي حڪمت عملي بابت راءِ ورتي وئي، ڪميونٽي پاران هن تعليمي قدمن کي ساراهيو ويو ۽ ان کي علائقي ۾ تعليم جي واڌاري لاءِ اهم ۽ ڪارآمد شروعات قرار ڏنو ويو