سنڌ مزدور تحريڪ پاران پورهيت مير مرتضيٰ شيخ جي برطرفي خلاف تحريڪ جو اعلان

ملير (رپورٽ: عبدالرشيد مورجھريو) سنڌي مزدور تحريڪ جي اڳواڻن امر مگسي، محمد علي ساهڙ ۽ ايڊووڪيٽ رستم ميراني، نوڪريءَ مان برطرف ڪيل نوجوان مزدور مير مرتضيٰ شيخ ۽ سندس والد در محمد شيخ سان گڏ عوامي پريس ڪلب ملير ۾ هڪ ڀرپور پريس ڪانفرنس ڪئي ان موقعي تي متاثر پورهيت مير مرتضيٰ شيخ ٻڌايو ته هن آگسٽ 2018ع ۾ نيشنل فوڊ پريميئر انڊسٽريز ۾ ملازمت اختيار ڪئي هئي ۽ پنهنجي سموري ملازمت دوران ايمانداري، محنت ۽ نظم و ضبط سان پنهنجون ذميواريون نڀايون. هن الزام هنيو ته ڪجهه ڏينهن اڳ کيس بنا ڪنهن سبب، مبينا طور تي غلط فهمي يا انتظامي تڪرار جي بنياد تي ڊيوٽي تان روڪي گهر موڪليو ويو جيڪو ساڻس سراسر ناانصافي ۽ مزدور حقن جي ڀڃڪڙي آهي پريس ڪانفرنس کي خطاب ڪندي سنڌي مزدور تحريڪ جي اڳواڻن چيو ته مير مرتضيٰ شيخ جي جبري برطرفي واري معاملي جي حل لاءِ ڪيترائي ڀيرا فيڪٽري انتظاميا سان رابطا ڪيا ويا، پر افسوس جو اڃا تائين ڪا به مثبت اڳڀرائي نه ٿي سگهي آهي هنن چيو ته ان صورتحال کي نظر ۾ رکندي سنڌي مزدور تحريڪ مير مرتضيٰ شيخ جي فوري بحالي ۽ کيس انصاف فراهم ڪرڻ جو مطالبو ڪندي اعلان ڪيو ته مزدور جي قانوني حقن جي تحفظ لاءِ ليبر ڪورٽ سميت سمورن لاڳاپيل قانوني فورمن سان رابطو ڪيو ويندو. هنن ٻڌايو ته 25 جون تي پرامن احتجاجي مارچ ۽ مظاهرو ڪيو ويندو، جڏهن ته 29 جون تي متاثر مزدور سان يڪجهتي جي اظهار لاءِ علامتي بک هڙتال پڻ ڪئي ويندي هنن خبردار ڪيو ته جيڪڏهن فيڪٽري انتظاميا مير مرتضيٰ شيخ کي فوري طور تي بحال نه ڪيو ته جولاءِ جي پهرين هفتي دوران فيڪٽري جي مرڪزي گيٽ آڏو سوين مزدورن جي شرڪت سان پرامن احتجاجي ڌرڻو هنيو ويندو پريس ڪانفرنس ۾ اڳواڻن وڌيڪ چيو ته معاملي بابت سمورا تفصيل، دستاويز ۽ شڪايتون آءِ جي سنڌ، ڊي جي رينجرز سنڌ، ڊسٽرڪٽ اينڊ سيشن جج ملير، ملير بار ايسوسيئيشن، ايس ايس پي ملير، ايس ايڇ او بن قاسم ۽ ٻين لاڳاپيل ادارن ڏانهن موڪليون ويون آهن، جيئن شفاف، غيرجانبدار ۽ منصفاڻي جاچ کي يقيني بڻائي سگهجي سنڌي مزدور تحريڪ جي اڳواڻن حڪومت، لاڳاپيل ادارن ۽ فيڪٽري انتظاميا کان مطالبو ڪيو ته ، انصاف ۽ ليبر قانونن جي تقاضائن موجب فوري نوٽيس وٺي مير مرتضيٰ شيخ کي سندس نوڪري تي بحال ڪيو وڃي، جيئن هڪ محنت ڪش مزدور ۽ سندس خاندان کي معاشي تڪليفن ۽ بي روزگاري جي بحران کان بچائي سگهجي.