گڏاپ ٽائون جا قديمي ڳوٺ جديد دور ۾ سهولتن کان محروم

انتظاميه شڪايتن باوجود قديمي کوهه کي محفوظ نه بڻائي سگهي

ملير (رپورٽ: عبدالرشيد مورجھريو) گڏاپ ٽائون جي يوسي صالح محمد ڳوٺ ۾ واقع قديمي لال محمد نوحاڻي ڳوٺ جا رهواسي اڄ به پاڻي، نيڪال ۽ رستن جهڙين بنيادي سهولتن کان محروم آهن. علائقي واسين موجب ڳوٺ جي وچ ۾ قيام پاڪستان کان اڳ وارو هڪ اونهو ۽ ناڪاره کوهه گذريل 15 سالن کان خطرناڪ حالت ۾ موجود آهي، جنهن ۾ ڪري امان رابعه ۽ عبدالسلام فوت ٿي چڪا آهن، جڏهن ته عليمه نالي هڪ نينگري کي بروقت امدادي ڪارروائي ذريعي بچايو ويو هو مقامي سماجي اڳواڻن ماسٽر يونس بلوچ، محمد انيس نوحاڻي، حنيف نوحاڻي ، منصور نو حاڻي، ۽ عبدالحميد نوحاڻي ، محمد ارسلان نوحاڻي ، فيضان نوحاڻي، عمران نوحاڻي ۽ نويد نوحاڻي ۽ ٻين ميڊيا سان ڳالهائيندي چيو ته بار بار شڪايتن باوجود انتظاميا کوهه کي محفوظ بڻائڻ يا بند ڪرڻ لاءِ ڪو به مؤثر قدم نه کنيو آهي. هنن ٻڌايو ته ٽي سال اڳ ڳوٺ جي داخلي رستي جي تعمير شروع ڪئي وئي هئي، پر منصوبو اڌورو ڇڏي ڏنو ويو. ساڳئي وقت لڳ ڀڳ 12 لک رپين جي لاڳت سان وڇايل پاڻي جي پائيپ لائين به اڃا تائين فعال نه ٿي سگهي آهي هنن وڌيڪ چيو ته 20 سال پراڻو نيڪال جو نظام مڪمل طور ناڪاره ٿي چڪو آهي، ڪيترن ئي مين هولن جا ڍڪ غائب آهن ۽ گندو پاڻي گهٽين توڙي گهرن ۾ بيهڻ سبب رهواسي سخت پريشان آهن.علائقي واسين ۽ سماجي اڳواڻن سنڌ حڪومت، ميئر ڪراچي، چونڊيل نمائندن ۽ گڊاپ ٽائون انتظاميا کان مطالبو ڪيو آهي ته ناڪاره کوهه کي فوري طور محفوظ بڻايو وڃي، پاڻي ۽ نيڪال جا منصوبا فعال ڪيا وڃن ۽ اڌوري پيل روڊ جي تعمير مڪمل ڪري ڳوٺاڻن کي بنيادي سهولتون فراهم ڪيون وڃن.