عمرڪوٽ: پوليس موبائيل ۾ چرس جا سگريٽ ٺاهي پيئندڙ 2ڄڻا گرفتار

ايس ايس پي عمرڪوٽ سهائي عزيز ٽالپر جي نوٽيس بعد پوليس ابوبڪر نهڙي ۽ روشن نهڙي کي گرفتار ڪري ورتو

عمرڪوٽ (رپورٽ:ڪانجي مل رکيسر) سوشل ميڊيا تي وائرل ٿيل پوليس موبائل اندر چرس جو سگريٽ تيار ڪري پيئڻ واري وڊيو جو ايس ايس پي عمرڪوٽ فوري نوٽيس وٺندي ڪارروائي جا حڪم جاري ڪيا، جنهن بعد کوکراپار ٿاڻي جي پوليس ڪارروائي ڪندي وڊيو ۾ موجود ٻن ڄڻن کي گرفتار ڪري ورتو، پوليس موجب گرفتار ٿيل جوابدارن ۾ ابوبڪر ولد مراد نھڙي ۽ روشن ولد حسين نھڙي، رهواسي ڇتريو تعلقو عمرڪوٽ شامل آهن، گرفتار جوابدارن جي قبضي مان 225 گرام چرس هٿ ڪئي وئي، پوليس گرفتار جوابدارن خلاف ڪيس نمبر 16/2026 تحت قلم 9(1)3(A) سنڌ ڪنٽرول آف نارڪوٽڪ سبسٽينس ايڪٽ 2024 ۽ دفع 403 تعزيرات پاڪستان تحت کوکراپار ٿاڻي تي ڪيس داخل ڪري ڇڏيو آهي، ابتدائي جاچ دوران معلوم ٿيو آهي ته جوابدارن پوليس موبائل اندر وڊيو ٺاهي ان کي سوشل ميڊيا تي وائرل ڪيو هو، جنهن تي ايس ايس پي عمرڪوٽ سهائي عزيز ٽالپر فوري نوٽيس وٺندي لاڳاپيل پوليس آفيسرن کي ڪارروائي جا حڪم ڏنا هئا، پوليس جو چوڻ آهي ته گرفتار جوابدارن کان وڌيڪَ جاچ جاري آهي، جڏهن ته واقعي ۾ پوليس اهلڪارن جي غفلت ۽ لاپرواهي بابت کاتي واري جاچ پڻ شروع ڪئي وئي آهي، جاچ مڪمل ٿيڻ بعد ذميوار اهلڪارن جي سڃاڻپ ڪري ضابطن موجب ڪارروائي ڪئي ويندي، ايس ايس پي عمرڪوٽ واضح ڪيو آهي ته قانون جي ڀڃڪڙي، منشيات جي استعمال، سوشل ميڊيا جي غلط استعمال ۽ سرڪاري فرضن ۾ غفلت ڪندڙ ڪنهن به شخص سان رعايت نه ڪئي ويندي ۽ بنا فرق قانوني ۽ کاتي واري ڪارروائي جاري رکي ويندي.